TIRANË ,22 korrik 2026/Albania Express News/-Ka shkuar në dy numri i viktimave nga aksidenti i rëndë i ndodhur pasditen e sotme në rrethrrotullimin e Saukut, në Tiranë.
Ngjarja e rëndë u regjistrua kur një betoniere u përfshi në një përplasje me një automjet, ndërsa më pas humbi kontrollin, çau barrierat mbrojtëse të rrugës dhe përfundoi në autostradë, duke rënë mbi një tjetër automjet që po qarkullonte poshtë saj.
Përplasja ishte e fuqishme dhe shkaktoi dëme të mëdha materiale, ndërsa disa persona mbetën të bllokuar në automjete. Menjëherë pas aksidentit, në vendngjarje mbërritën forcat e Policisë, ekipet zjarrfikëse dhe ambulancat, të cilat nisën ndërhyrjen për nxjerrjen e të plagosurve dhe transportimin e tyre drejt spitalit.
Pavarësisht përpjekjeve të mjekëve, dy persona kanë humbur jetën si pasojë e plagëve të marra. Ndërkohë, vijojnë verifikimet për identifikimin e viktimave dhe për zbardhjen e plotë të rrethanave të aksidentit.
Policia ka nisur hetimet për të përcaktuar shkaqet e përplasjes, ndërsa paraprakisht dyshohet se humbja e kontrollit të mjetit të tonazhit të rëndë ka qenë një nga faktorët që solli këtë tragjedi.
Aksidenti ka shkaktuar edhe bllokim të qarkullimit në zonën e Saukut, duke krijuar trafik të rënduar për drejtuesit e mjeteve që lëviznin në këtë aks.