Prrenjasi, dikur një qytet i harruar në skutat e harresës administrative, sot është në një transformim të jashtëzakonshëm. Në vetëm pak vite, nga një bashki që përballej me mungesë infrastrukture, probleme me ujin e pijshëm, shkolla të rrënuara dhe mungesë investimesh, është kthyer në një model zhvillimi që frymëzon. Në krye të kësaj kthese është një emër: z. Nuri Belba, Kryetar i Bashkisë Prrenjas.
Me një vizion të qartë dhe me një filozofi të bazuar në punë konkrete, jo premtime boshe, z. Belba ka arritur të ringjallë shpresën e qytetarëve dhe të rikthejë dinjitetin e një zone me histori, kulturë dhe potencial të madh ekonomik. Në këtë intervistë ekskluzive për “Albania Express News”, z. Belba flet për sfidat që trashëgoi, projektet madhore që ka realizuar dhe vizionin e tij për të ardhmen e Prrenjasit, një të ardhme që nuk është më thjesht një ëndërr, por një realitet që po ndërtohet çdo ditë.
Z. Belba, kur morët detyrën si Kryetar i Bashkisë Prrenjas, çfarë gjendje gjetët dhe cilat ishin sfidat më të mëdha që trashëguat?
Kur mora detyrën, Prrenjasi përballej me një situatë jashtëzakonisht të vështirë. Kishim një infrastrukturë të amortizuar, mungesë rrugësh të aksesueshme, shkolla dhe kopshte që ishin në gjendje të mjerueshme, shumë zona pa ujë të pijshëm e kanalizime dhe një mjedis të neglizhuar. Bujqësia ishte pothuajse jashtë vëmendjes, ndërsa hapësirat publike ishin të rrënuara. Ishte e qartë që qyteti dhe fshatrat kishin nevojë për një rindërtim të plotë, jo vetëm fizikisht, por edhe moralisht, për të rikthyer besimin e qytetarëve.
Cilat kanë qenë disa nga investimet më të rëndësishme që keni realizuar në këto vite?
Kemi ndërmarrë një plan të gjerë transformimi që përfshin çdo sektor jetik. Në infrastrukturë, kemi rehabilituar 18 rrugë kryesore dhe rurale, që sot lidhin më mirë fshatrat me qytetin dhe u japin qytetarëve lëvizshmëri dhe siguri. Janë ndërtuar ura të reja dhe janë rikonstruktuar ura ekzistuese, që kanë qenë një domosdoshmëri për lidhjet ndërzonale. Në arsim, kemi rikonstruktuar 5 shkolla dhe një çerdhe, duke përmirësuar ndjeshëm kushtet për rreth 1500 nxënës dhe mbi 120 fëmijë të vegjël. Po ashtu, kemi investuar në fusha sportive, kënde lojërash dhe qendra kulturore, sepse zhvillimi nuk është vetëm material, por edhe kulturor e shpirtëror.
Po për ujin e pijshëm dhe kanalizimet, një shqetësim i përhershëm për qytetarët?
Kemi ndërtuar 7 ujësjellës të rinj dhe kemi përmirësuar sistemet ekzistuese, duke u siguruar që më shumë se 29,000 banorë të kenë akses në ujë të pastër, 24 orë në ditë. Kanalizimet po ashtu janë zgjeruar me dy sisteme të reja, që ndikojnë drejtpërdrejt në përmirësimin e higjienës dhe shëndetit publik.
Ju keni vendosur një theks të madh edhe te mjedisi dhe gjelbërimi. Çfarë është bërë konkretisht në këtë drejtim?
E kam thënë që në fillim, një qytet i pastër është një qytet që frymon. Kemi pastruar territorin, vendosur kontenierë të rinj, mbjellë mijëra pemë dhe rehabilituar zona të degraduara. Kemi ngritur edhe një qendër riciklimi për letrën dhe kemi investuar në efikasitetin energjetik për banorët. Për mua, mjedisi nuk është luks, por nevojë.
Bujqësia është një burim jetese për shumë familje. Çfarë keni bërë për të ndihmuar fermerët?
Bujqësia ka qenë prioritet. Kemi rehabilituar 11 kanale vaditëse dhe kulluese që përmirësojnë prodhimin për mbi 15,000 banorë. Po ashtu, kemi lehtësuar investimet në agroturizëm, kemi mbështetur panaire dhe kemi ndërmarrë projekte për modernizimin e teknologjisë bujqësore. E ardhmja e Prrenjasit qëndron edhe në zhvillimin rural.
Po për kujdesin social dhe shëndetësor?
Në këtë aspekt kemi hapur 2 qendra sociale për fëmijët me aftësi ndryshe dhe për të moshuarit. Janë rikonstruktuar 5 qendra shëndetësore dhe vetë spitali i qytetit, duke rritur ndjeshëm cilësinë e shërbimeve. Sot, qytetarët kanë akses më të mirë dhe më të dinjitetshëm në kujdesin shëndetësor.
Cilat janë disa nga projektet që do të ndërmerrni në të ardhmen?
Ne nuk ndalemi. Së shpejti do të fillojmë rikonstruksionin e një shkolle të re 9-vjeçare në njësinë administrative Prrenjas dhe do të vijojmë me investime në infrastrukturën shkollore në fshatra. Do të zgjerojmë më tej rrjetin e ujësjellësit dhe kanalizimeve në zonat ende të pashërbyera. Do të vazhdojmë me pastrimin dhe gjelbërimin, ndërtimin e rrugëve dhe urave të reja dhe, natyrisht, me projekte moderne për zhvillimin e bujqësisë.
Në fund, cili është mesazhi juaj për qytetarët e Prrenjasit?
Faleminderit nga zemra për besimin dhe bashkëpunimin. Çdo gur, çdo rrugë, çdo shkollë që po ndërtojmë, po e bëjmë së bashku. Ky është vetëm fillimi. Prrenjasi nuk do të jetë më një vend ku largohesh ,por një vend ku ia vlen të jetosh, të punosh dhe të ndërtosh të ardhmen tënde. Unë besoj në këtë qytet, besoj në njerëzit e tij dhe bashkë, do të ndërtojmë një Prrenjas të ri.
Z. Belba, faleminderit për intervistën dhe punën që po bëni.
Faleminderit juve! Prrenjasi meriton më shumë, dhe ne do të bëjmë gjithçka për ta çuar më tej këtë zhvillim.
Intervistoi: Fatmir Popja
