Mesditën e së martës, në një atmosferë të mbushur me respekt dhe mirënjohje për historinë, u përkujtua 81-vjetori i formimit të Batalionit Partizan të Polisit, një nga simbolet më të rëndësishme të qëndresës antifashiste gjatë Luftës së Dytë Botërore. Në ceremoninë përkujtimore morën pjesë Kryetari i Bashkisë Librazhd, Mariglen Disha, Ministrja e Shtetit për Rininë dhe Fëmijët, Bora Muzhaqi, si dhe dhjetëra banorë të zonës së Polisit dhe fshatrave përreth.
Aktiviteti u zhvillua në nderim të burrave dhe grave që në një nga periudhat më të errëta të historisë, zgjodhën të rreshtohen në anën e drejtë të historisë, krah koalicionit të madh antifashist. Në fjalën e tij përshëndetëse, Kryebashkiaku Disha theksoi rëndësinë e ruajtjes së kujtesës historike dhe vlerave të lirisë.
“Sot përulemi me nderim ndaj atyre që sakrifikuan gjithçka për çlirimin e atdheut. Batalioni i Polisit është një emër i madh në historinë tonë, një simbol i guximit, vendosmërisë dhe dashurisë për vendin”.
Ministrja Muzhaqi, ndërkohë, vlerësoi kontributin e brezave të kaluar dhe theksoi rëndësinë e edukimit të të rinjve me këto vlera: “Është detyra jonë si shoqëri të mos lejojmë që këto sakrifica të harrohen. Të rinjtë duhet të njohin dhe të çmojnë historinë e vendit të tyre, për të ndërtuar një të ardhme më të drejtë dhe të qëndrueshme”.
Formuar në gusht të vitit 1944, Batalioni i Polisit përbënte një forcë vendimtare në rezistencën ndaj pushtuesve fashistë në zonën lindore të vendit. Trimat e kësaj njësie dhanë shembullin e heroizmit dhe sakrificës, duke kontribuar në përpjekjet për çlirimin e Shqipërisë.
Ceremonia u mbyll me vendosjen e kurorave pranë memorialit përkujtimor, mes duartrokitjesh dhe himnit kombëtar, një nderim për një brez që zgjodhi të luftojë për një Shqipëri të lirë dhe sovrane.
albaniaexpress.al