ELBASAN ,13 qershor 2026/Albania Express News/ Shërbimi i Urgjencës pranë Spitalit Rajonal të Elbasanit ka dalë me një deklaratë publike për të sqaruar rrethanat e një videoje të publikuar së fundmi në rrjetet sociale, e cila ka ngjallur reagime dhe diskutime në opinionin publik.
Sipas deklaratës zyrtare, pamjet e publikuara paraqesin vetëm një pjesë të shkëputur të ndërhyrjes së ekipit të Urgjencës 127 dhe nuk pasqyrojnë të gjithë situatën që është menaxhuar nga personeli shëndetësor.
Shërbimi bën me dije se pacientja e përfshirë në këtë rast vuante nga një këmbë diabetike dhe, megjithëse stafi mjekësor i rekomandoi hospitalizimin, ajo ka refuzuar shtrimin në spital. Në këto kushte, pas konsultimit me mjekun përgjegjës, iu administrua trajtimi i nevojshëm simptomatik në përputhje me gjendjen e saj klinike dhe protokollet mjekësore në fuqi.
Në deklaratë sqarohet gjithashtu se gjatë ndërhyrjes, personi që realizonte filmimin i ka kërkuar infermierit administrimin e një medikamenti qetësues pa ekzistuar indikacion mjekësor. Kjo kërkesë është refuzuar nga personeli shëndetësor, duke respektuar detyrimet profesionale dhe ligjore që rregullojnë ushtrimin e profesionit.
Sipas Shërbimit të Urgjencës, pas këtij refuzimi infermieri është përballur me ofendime dhe sjellje fyese deri në momentin e mbërritjes së forcave të Policisë së Shtetit, të cilat janë njoftuar nga vetë stafi i urgjencës për menaxhimin e situatës.
Në reagimin e saj, Urgjenca e Elbasanit thekson se infermieri që shfaqet në video është një profesionist me mbi 30 vite eksperiencë në këtë shërbim, i njohur për profesionalizmin, korrektësinë dhe përkushtimin ndaj pacientëve.
Në përfundim të deklaratës, Shërbimi i Urgjencës u bën thirrje qytetarëve, mediave dhe opinionit publik që të vlerësojnë ngjarjen në tërësinë e saj dhe të mos nxjerrin përfundime bazuar vetëm në fragmente të shkëputura nga konteksti, duke nënvizuar se stafi i Urgjencës së Elbasanit vijon të jetë në shërbim të qytetarëve 24 orë në ditë, 7 ditë në javë, me profesionalizëm, përgjegjësi dhe përkushtim maksimal ndaj çdo rasti që kërkon ndihmë mjekësore.