Në kuadër të projektit “Master Plan 360”, të mbështetur nga EHF (European Handball Federation), kanë mbërritur në Shqipëri bazat materiale të destinuara për zhvillimin e hendbollit te fëmijët. Paketa përfshin 200 topa dhe 10 palë porta hendbolli, të cilat do të shpërndahen tek ekipet e fëmijëve që janë pjesë e këtij projekti.
Projekti “Master Plan 360” ka për objektiv implementimin dhe zhvillimin e sportit të hendbollit tek fëmijët e grupmoshave U8, U10, U12 dhe U14, duke krijuar kushte më të mira për stërvitje dhe pjesëmarrje në aktivitetet sportive.
Baza materiale do t’u shpërndahet ekipeve që janë formuar dhe kanë qenë aktive në projekt gjatë vitit të kaluar. Gjithashtu, me topa dhe porta do të pajisen edhe tre ekipe të reja nga qytete të ndryshme të Shqipërisë, të cilat kanë shprehur dëshirën të bëhen pjesë e projektit për sezonin sportiv 2026–2027.
Ky investim përfaqëson një hap të rëndësishëm në zgjerimin e hendbollit për fëmijë në vend, duke mbështetur krijimin e kushteve të nevojshme për zhvillimin e talenteve të reja dhe rritjen e pjesëmarrjes në këtë sport.