TIRANE, 30 maj 2026/Albania Express News/Partia Demokratike zhvillon sot punimet e Kuvendit Kombëtar, ku delegatët do të votojnë fillimisht për përbërjen e Komisionit të Drejtimit të Punimeve dhe Sekretariatin Teknik. Para pak çastesh në selinë Blu ka mbërritur kryetari Sali Berisha.
Gjithçka nisi me një video të një avatari me pamjen e heroit Kombëtar Skënderbeu, i cili “shprehej” ndër të tjera: “Unë jam Skënderbeu i vërtetë, jo i Elisës. Nuk kam kushtuar miliona, por vetëm 100 euro”.
Komisioni që do të drejtojë punimet përbëhet nga Ivi Kaso në cilësinë e kryetarit, si dhe anëtarët Floriana Garo, Bardh Spahia, Eliona Shkreli dhe Nada Meçorapaj. Pas miratimit të tyre nga delegatët me votim të hapur, Kuvendi do të nisë zyrtarisht aktivitetin, i cili do të hapet me fjalën e kryetarit të Partisë Demokratike, Sali Berisha.
Një nga pikat kryesore të mbledhjes do të jetë prezantimi i tetë amendamenteve statutore, të cilat do të paraqiten nga kreu i grupit parlamentar demokrat, Gazmend Bardhi, për t’iu nënshtruar më pas votimit të delegatëve. Aktualisht ka nisur regjistrimi i delegatëve.
Ndryshimet e propozuara prekin edhe procesin e përzgjedhjes së kandidatëve për deputetë dhe kryetarë bashkish. Statuti i ri parashikon krijimin e një strukture të posaçme brenda partisë, e cila do të filtrojë kandidaturat përpara se ato t’i nënshtrohen votës së anëtarësisë. Në të njëjtën kohë, dokumenti i ri synon të adresojë problematikat e listave të anëtarësisë përmes dixhitalizimit dhe përditësimit të tyre çdo dy vjet.
Gjatë punimeve të Kuvendit do të zhvillohet edhe votimi për 200 anëtarët e rinj të Këshillit Kombëtar. Ky proces do të realizohet në ambientet e Pallatit të Kongreseve, paralelisht me diskutimet dhe fjalimet e parashikuara në axhendë.
Pas konstituimit të tij, Këshilli Kombëtar do të ketë si detyrë shqyrtimin dhe votimin e propozimeve të Sali Berishës për ekipin e ri drejtues të Partisë Demokratike. Kuvendi Kombëtar mblidhet vetëm një javë pas zgjedhjeve për kryetarin e partisë, në të cilat u rizgjodh Sali Berisha, kandidati i vetëm në garë.