TURQI,14 maj 2026/Albania Express News/Moti i keq ka goditur disa zona të Turqisë, ku tornado dhe reshje të forta breshëri janë regjistruar në qytete të ndryshme, duke shkaktuar të plagosur dhe dëme materiale.
Një tornado e fuqishme u formua në Menemen të Izmirit, ndërsa zona u përfshi edhe nga reshje intensive breshëri. Fenomeni atmosferik u filmua nga banorët dhe pamjet u shpërndanë gjerësisht në rrjetet sociale. Sipas profesoreshës së gjeografisë në Universitetin Bakircai të Izmirit, Sermin Tagil, temperaturat e sipërfaqes së detit Egje kanë qenë 2 deri në 3 gradë më të larta se normalja sezonale, duke krijuar kushtet për formimin e tornadove dhe stuhive të forta.
Ajo shpjegoi se depërtimi i masave të ajrit të ftohtë nga veriperëndimi, në kombinim me ajrin e ngrohtë dhe të lagësht në rajon, shkaktoi ngritje të shpejtë të energjisë atmosferike, duke sjellë tornado në shkallë të vogël dhe reshje lokale breshëri.
“Në ditët në vijim, energjia e grumbulluar në atmosferë, kur përplaset me masa të ftohta ajri nga perëndimi dhe veriperëndimi, mund të shkaktojë stuhi të papritura dhe shumë të fuqishme”, deklaroi ajo për Anadolu Agency.
Ndërkohë, një tjetër tornado goditi distriktin Sungurlu në Çorum, duke shkaktuar dëme në fshatrat Oyaka dhe Kavsut. Katër persona mbetën të plagosur nga moti ekstrem.
Sipas autoriteteve lokale, erërat e forta rrëzuan çatitë e disa banesave, ndërsa pemë dhe shtylla të energjisë elektrike u shembën në disa zona. Fenomeni i tornadove u regjistrua edhe në Kızılırmak të Çankırı, ku stuhitë e forta përfshinë rajonin dhe banorët filmuan momentin e formimit të tornados me telefonat e tyre celularë.
Autoritetet turke kanë paralajmëruar qytetarët të tregojnë kujdes, pasi kushtet atmosferike të paqëndrueshme pritet të vijojnë edhe në ditët e ardhshme.