TIRANË, 5 maj 2026 /Albania Express News/ Fillimi i javës ka sjellë intensitet të lartë pune në Portin e Durrësit, ku janë planifikuar për përpunim 10 anije tregtare, kryesisht të ngarkuara me lëndë të para për sektorin e ndërtimit.
Sipas Autoritetit Portual Durrës, aktualisht në përpunim ndodhen 6 anije, konkretisht 2 anije me rreth 5,050 ton xhama, 3 anije me rreth 6,650 ton çimento dhe 1 anije me afro 4,950 ton melaminë.
Këto mallra furnizojnë drejtpërdrejt industrinë e ndërtimit dhe kantierët në të gjithë vendin, duke mbështetur projektet infrastrukturore dhe zhvillimin urban.
Autoriteti portual bëri të ditur se ritmet e larta të përpunimit pasqyrojnë një kërkesë të qëndrueshme për materiale ndërtimi, si dhe funksionimin efikas të zinxhirit logjistik, nga mbërritja e anijeve në port deri te shpërndarja në tregun vendas.
Porti i Durrësit mbetet nyja kryesore e transportit detar në vend, duke luajtur një rol thelbësor në mbështetjen e aktivitetit ekonomik dhe tregtar të Shqipërisë.