Skënderbeu i Korçës është shumë pranë rikthimit në elitën e futbollit shqiptar dhe mund të festojnë që këtë javë ngjitjen në Kategorinë Superiore.
Skuadra bardhekuqe pret këtë të dielë në shtëpi Kastriotin e Krujës, në një ndeshje ku fitorja është detyrim absolut. Megjithatë, fati i tyre nuk varet vetëm nga rezultati në fushën e tyre, pasi vëmendja do të jetë e përqendruar edhe në sfidën direkte mes KF Laçi dhe KS Pogradeci.
Ky duel konsiderohet një “finale” për vendin e dytë dhe të tretë në renditje, ndërsa një barazim mes tyre, i kombinuar me një fitore të Skënderbeut, do t’i shpallte zyrtarisht korçarët si skuadër të Superiores për sezonin e ardhshëm.
Edhe pse në horizont mbeten dy përballje të vështira pikërisht ndaj ndjekësve direkt, Laçit dhe Pogradecit, avantazhi prej tre pikësh dhe forma pozitive e ekipit e vendosin Skënderbeun si favorit kryesor për të realizuar objektivin madhor: rikthimin aty ku e konsideron veten, mes më të mirëve të futbollit shqiptar.