Gafa, kartonë dhe shumë tension, në fund mes Milan e Como feston…Inter. Në sytë e Tom Brady, i ftuar special në “San Siro”, “djalli” ngec në një “X” 1-1 përballë Comos, një hap fals, nëse mund të konsiderohet i tillë, që largon Milan nga kreu, -7 pikë në raport me rivalin e përjetshëm. Lajmi i mirë është se arrin të mbajë larg rivalët në garën për të siguruar një vend në Champions, +4 nga Napoli dhe +7 në raport me Romën.
Si rrallë herë, ishte Mike Maignan që gaboi në mënyrë fatale në minutën e 32-të duke i dhuruar një asist të pastër Nico Paz, me argjentinasin që nuk fali duke kaluar Como-n në avantazh.
Në fraksionin e dytë, Allegri nisi valsin e zëvendësimeve, ndërsa në minutën e 64-ët diferencën e bëri një super asist nga Jashari, me këtë të fundit që gjeti Leaon me një top të gjatë. Portugezi përfitoi edhe nga dalja e gabuar e portierit dhe me një parabël të ëmbël dërgoi topin në rrjetë duke barazuar shifrat në 1-1. Me kalimin e minutave vëmendjen e rrëmbyen Allegri dhe Fabregas, ku një prekje e lehtë e trajnerit të Como-s ndaj Saelemaekers tërboi trajnerin e Milan, me këtë të fundit që shpërtheu në protesta duke bërë që gjyqtari i takimit ta ndëshkojë me karton të kuq. Me këtë pikë të marrë në “San Siro”, Como mban të ndezur objektivin për të siguruar një vend në Evropë.