AC Milan ka njoftuar se ka nënshkruar kontratën me mesfushorin shqiptar Aron Babaj, i cili do t’i bashkohet Projektit Milan Futuro, iniciativë e klubit italian e dedikuar zhvillimit të talenteve të reja.
16-vjeçari, i lindur në Prishtinë në vitin 2009, ka zgjedhur të bashkohet me Rossonerët pas periudhës së tij te KF Prishtina e Re, ku ka spikatur si një nga talentet më premtuese të moshave të tij. Kalimi te një nga klubet më të mëdha të futbollit botëror i ofron Babajt mundësinë për të zhvilluar më tej potencialin e tij në një ambient me standarde të larta profesionale dhe konkurruese.
KF Prishtina e Re ka shprehur krenarinë për këtë arritje dhe i ka uruar shumë suksese në kapitullin e ri të karrierës, duke theksuar rëndësinë e këtij transferimi si shembull për futbollistët e rinj në Kosovë.
Babaj ka qenë më herët pjesë e Skeid dhe Lyn në Norvegji, para se të luante me moshat e Trepçës dhe Prishtinës së Re. Ai vjen nga një familje me traditë futbollistike, ku edhe i ati i tij, Shpëtimi Babaj, ka luajtur më parë në Shqipëri për klubet Besa, Elbasani, Gramozin dhe Tiranën.
16-vjeçari do të trajnohet në akademinë e Milanit, një nga më prestigjiozet në botë, dhe pritet të ndihmojë në përforcimin e projektit të klubit për rritjen e talenteve të reja.