Kryetari i Partisë Demokratike, Sali Berisha deklaroi sot se Gjykata Kushtetuese, me vendimin e saj për të pezulluar masën e pezullimit nga detyra të ministres së Energjisë dhe Infrastrukturës, Belinda Balluku, dëshmoi nënshtrimin e saj të plotë ndaj qeverisë.
Në një deklaratë për mediet Berisha tha se anëtarët e Gjykatës Kushtetues, e morën një vendim në kundërshtim me çdo praktikë të mëparshme.
“Ftoj çdo shqiptar të pyesë: çfarë morali kanë këta gjykatës apo gjykatëse të gjykojnë në themel masën e pezullimit pasi votuan një herë për heqjen e saj në kundërshtim me ligjin? Cili është morali i tyre? Morali i tyre është zero, në rrafshin ligjor flas.
“Ata u nënshtruan, u paritën, u kërcënuan, por morën një vendim në kundërshtim flagrant me çdo praktikë të mëparshme. Mos harroni se ata nuk legjitimuan kërkesën e një të pestës së deputetëve të opozitës në rastin e Sali Berishës, duke deklaruar në mënyrën më të turpshme se nuk legjitimohen ata, por parlamenti. Një turp i paparë ndonjëherë, në një kohë kur neni i Kushtetutës është taksativ: një e pesta e deputetëve legjitimohen për të paraqitur ankesa dhe kërkesa në Gjykatën Kushtetuese”, tha Berisha.
Sipas Berishës, “Gjykata Kushtetuese nuk është gjë tjetër vetëm një organizatë e shpifur e PS”.
Berisha u ndal edhe tek mbledhja e Këshillit të Mandateve për Ballukun, ku theksoi se kryeministri Edi Rama “po sfidon në një grusht shteti, qytetarët shqiptarë, të cilët presin me të drejtë dhe padurim të shohin para ligjit qeveritarët që janë bërë milionerë dhe miliarderë me taksat dhe pasuritë e tyre”.