Maturantët më të spikatur nga e gjithë Shqipëria u nderuan në mjediset e Kryeministrisë me Medaljen e Artë, në një ceremoni tashmë tradicionale që vlerëson ekselencën akademike. Mes tyre spikatën edhe maturantë nga shtatë bashkitë e Qarkut Elbasan, të cilët kanë arritur rezultate maksimale në përfundim të arsimit të mesëm.
Nga Librazhdi, Medaljen e Artë e mori Denida Balla, maturante e Gjimnazit “Ibrahim Muça”, ndërsa nga qyteti i Elbasanit u vlerësuan Ilda Idrizi nga “Dhaskal Todri”, Gledjon Bajrami nga “Liria” si dhe Pavlina Bezati nga “Luigj Gurakuqi”, së bashku me maturantë të tjerë ekselentë të qarkut.
Kryeministri Edi Rama mikpriti të rinjtë në Kryeministri, duke iu dorëzuar personalisht Medaljen e Artë dhe certifikatën shoqëruese, si një shenjë mirënjohjeje për përkushtimin, disiplinën dhe rezultatet e shkëlqyera në mësime. Në ceremoni ishte e pranishme edhe Ministrja e Arsimit, Mirela Kumbaro, e cila ndau mesazhe frymëzuese për të rinjtë, duke theksuar se suksesi është fryt i përpjekjes së përditshme dhe i zgjedhjes për të ndjekur rrugën e dijes.
Në fjalën e tij, Kryeministri Rama theksoi se këtë vit është shënuar numri më i lartë i medaljeve të arta që nga krijimi i këtij eventi, një tregues domethënës i rritjes së performancës akademike në vend. Ai nënvizoi gjithashtu se ky progres përkon me rritjen e numrit të studentëve shqiptarë që pranohen në universitete prestigjioze ndërkombëtare.
Rama e vuri theksin te roli i shembullit pozitiv që këta maturantë përfaqësojnë për shoqërinë, duke theksuar se ata kanë zgjedhur të mos kërkojnë justifikime, por të ndjekin suksesin, pavarësisht vështirësive familjare, sociale apo tundimeve të kohës. Ai falënderoi gjithashtu prindërit dhe mësuesit për kontributin e tyre vendimtar në këtë rrugëtim.
Në përmbyllje, Kryeministri u uroi të rinjve suksese në rrugën e tyre të ardhshme akademike dhe profesionale, duke i inkurajuar të ndjekin ëndrrat me guxim e këmbëngulje dhe të mos harrojnë kurrë rrënjët e tyre, si dhe mundësinë për t’i kthyer dijen dhe përvojën e fituar në shërbim të Shqipërisë.
