Volejbolli shqiptar shkruan një nga faqet më të arta të historisë së tij! Nga Gramshi në majat e Europës, Erblira Bici është tashmë simbol i suksesit dhe krenarisë kombëtare, pasi udhëhoqi skuadrën italiane Megabox Vallefoglia drejt triumfit në CEV Challenge Cup për sezonin 2025–2026.
Në një finale që do të mbahet mend gjatë, Megabox mposhti greket e Panathinaikos, duke vulosur një sukses historik në pjesëmarrjen e saj të parë europiane. Pas fitores dramatike 3-2 në ndeshjen e parë në Itali, skuadra italiane e drejtuar nga trajneri Andrea Pistola konfirmoi epërsinë edhe në Athinë, duke triumfuar pastër 0-3 (20-25, 25-27, 16-25) përballë mbi 3500 tifozëve.
Bici, protagoniste absolute – kur talenti bëhet histori
Në qendër të këtij triumfi ishte e jashtëzakonshmja Bici. Me një performancë brilante, ajo realizoi 23 pikë dhe 3 blloqe vendimtare, duke u shpallur merituar MVP e finales dhe njëkohësisht realizuesja më e mirë e kompeticionit. Një paraqitje që jo vetëm vulosi suksesin e skuadrës, por edhe ngriti flamurin shqiptar në skenën më të lartë europiane të volejbollit.
Dominim në parket , një finale pa histori
Megabox tregoi superioritet që në setin e parë, duke marrë kontrollin e lojës dhe duke ruajtur qetësinë në momentet kyçe. Edhe pse Panathinaikos tentoi të rikthehej në lojë, blloqet dhe sulmet e sakta të Bicit bënë diferencën.
Seti i dytë solli më shumë rivalitet, me vendaset që krijuan avantazh të hershëm, por reagimi i fortë i Megabox dhe një seri shërbimesh vendimtare përmbysën gjithçka. Në fund, ishte sërish skuadra italiane që tregoi nerva të forta, duke mbyllur setin dhe praktikisht finalen.
Seti i tretë ishte formalitet: dominim total dhe vulosje e një fitoreje të madhe që i jep klubit të parë trofeun europian në histori.
Një sukses që tejkalon sportin
Ky triumf nuk është vetëm një fitore për Erblira Bici dhe skuadrën e saj, por një moment krenarie për gjithë sportin shqiptar. Nga një qytet i vogël si Gramshi, në skenën më të madhe të Europës – historia e saj është frymëzim për një brez të tërë sportistësh.
Erblira Bici tashmë nuk është vetëm një kampione , ajo është një histori suksesi që po shkruhet me shkronja të arta në arenën ndërkombëtare.