GREQI, 31 korrik 2026/Albania Express News/-Qindra persona, kryesisht turistë, po evakuohen me anije nga qyteti bregdetar Agios Vasileios në Greqinë qendrore, pasi një zjarr i madh pyjor u përhap me shpejtësi drejt zonës së banuar, i favorizuar nga erërat e forta.
Sipas autoriteteve greke, mbi 200 persona janë larguar tashmë në mënyrë të sigurt, ndërsa rreth 100 të tjerë pritet të evakuohen nga deti.
Zjarri shpërtheu të premten në mëngjes pranë Agios Vasileios, në rajonin e Viotisë, duke bllokuar rreth 500 persona, shumica turistë. Autoritetet kishin urdhëruar fillimisht banorët dhe vizitorët të zhvendoseshin drejt pjesës së brendshme të qytetit, por përhapja e shpejtë e flakëve bëri të nevojshme evakuimin me mjete lundruese.
Zjarrfikësit vazhdojnë operacionet për shuarjen e një zjarri të madh në ishullin e Kretës, i cili ka djegur mijëra hektarë tokë dhe ka detyruar rreth 8 mijë persona të largohen përkohësisht nga shtëpitë dhe zonat turistike.
Vatra zjarri janë raportuar edhe në ishujt Paros, Andros dhe Kalymnos, ndërsa autoritetet paralajmërojnë se erërat e forta dhe temperaturat e larta po e bëjnë situatën veçanërisht të vështirë për ekipet e emergjencës.
Greqia është një nga disa shtete evropiane që po përballen me zjarre të mëdha pyjore pas valëve të njëpasnjëshme të të nxehtit, të cilat kanë krijuar kushte ideale për përhapjen e flakëve. Shkencëtarët theksojnë se, megjithëse shumica e zjarreve shkaktohen nga aktiviteti njerëzor, ndryshimet klimatike po rrisin ndjeshëm frekuencën dhe intensitetin e tyre.
Situata mbetet kritike edhe në Portugali dhe Spanjë. Në Portugali, qindra zjarrfikës po luftojnë një zjarr pranë Valpaços, i cili ka shkatërruar rreth 15 mijë hektarë tokë, përfshirë vreshta dhe ullishte, ndërsa pesë persona kanë mbetur të plagosur.
Në Spanjë, zjarri në rajonin e Ávilës është stabilizuar, ndërsa autoritetet paralajmërojnë për rrezik të lartë të shpërthimit të zjarreve të reja për shkak të një vale të re të të nxehtit.
Edhe Turqia vijon të përballet me zjarret pyjore. Sipas Ministrisë së Bujqësisë, katër vatra aktive mbeten përgjatë bregdetit mesdhetar, përfshirë zonat pranë Antalyas, ndërsa që nga e mërkura janë regjistruar gjithsej 206 zjarre në të gjithë vendin.