LIBRAZHD, 10 shtator 2026 /Albania Express News/ – Zjarret janë rikthyer gjatë 24 orëve të fundit në territorin e Librazhdit, duke vënë në rrezik sipërfaqe të konsiderueshme të natyrës, pronat dhe sigurinë e banorëve.
Flakët janë shfaqur në Malin e Polisit dhe në zonën e Hotolishtit, duke detyruar shërbimet zjarrfikëse të angazhohen sërish në terren për përballimin dhe neutralizimin e vatrave të zjarrit.
Në këto situata, zjarrfikësit e Librazhdit janë vendosur në vijën e parë të ndërhyrjes. Për orë të tëra, efektivët kanë punuar në kushte të vështira, në terrene të thepisura, nën temperatura të larta dhe mes tymit e flakëve, me qëllim kufizimin e përhapjes së zjarrit dhe mbrojtjen e jetës, pronës dhe pasurive natyrore.
Puna e tyre kërkon jo vetëm përgatitje profesionale, por edhe guxim e përkushtim, pasi ndërhyrjet në zonat malore dhe në vatra zjarri mbartin rrezik të vazhdueshëm për jetën e efektivëve.
Zjarrfikësit vijojnë të jenë të angazhuar në terren, duke monitoruar situatën dhe duke ndërhyrë për shuarjen e vatrave të zjarrit dhe parandalimin e përhapjes së tyre.
Përballë kësaj situate, apeli për qytetarët mbetet i qartë: të tregojnë maksimalisht kujdes dhe të shmangin çdo veprim që mund të shkaktojë zjarre. Një pakujdesi e çastit mund të shkaktojë dëme të mëdha në pyje, kullota, prona dhe, mbi të gjitha, të rrezikojë jetën e njerëzve.
Në çdo situatë emergjente, shërbimet zjarrfikëse mbeten në gatishmëri për t’iu përgjigjur rasteve dhe për të mbrojtur komunitetin.