Nga Fatmir Popja
Burime zyrtare konfirmojnë se 8 persona janë transportuar për ndihmë mjekësore pas lëndimeve të shkaktuara nga zjarret shkatërruese që kanë përfshirë disa fshatra të Gramshit.
Të lënduarit raportohen me djegie të lehta dhe të shkallës mesatare, ndërsa ndodhen nën kujdesin e mjekëve. Fatkeqësisht, një i moshuar ka humbur jetën, ndërsa shumë të tjerë kanë pësuar dëmtime gjatë përpjekjes për t’u larguar nga flakët ditën e martë.
Sipas autoriteteve, një numër i konsiderueshëm i të plagosurve ndodhen ende në zonat e rrezikuara dhe nuk kanë mundur të transportohen në qytetin e Gramshit, për shkak të flakëve, tymit të dendur dhe vështirësive të terrenit.
Stadiumi i qytetit është kthyer në pikë pritjeje për helikopterët e emergjencave civile, që po përdoren për transportin ajror të të lënduarve drejt Repartit të Djegieve në Tiranë, por aksesi i vështirë në fshatra po pengon evakuimin në kohë të të dëmtuarve.
Situata mbetet kritike, ndërsa strukturat shtetërore, emergjencat, policia dhe Forcat e Armatosura po vijojnë punën për shpëtimin e jetëve, evakuimin e banorëve dhe frenimin e përhapjes së zjarri.Çdo minutë është vendimtare.
Apelohet për bashkëpunim dhe qetësi nga komuniteti, ndërsa situata është dramatike.