SHKODËR ,17 shtator 2026 /Albania Express News/-Kryetari i Bashkisë Shkodër, Benet Beci, ka reaguar për ndarjen nga jeta të Esat Bushatit, një prej emrave të respektuar të futbollit shkodran dhe atij shqiptar.
Në një postim në rrjetet sociale, Beci shpreh ngushëllimet për familjen Bushati dhe gjithë komunitetin sportiv shkodran, duke vlerësuar kontributin e gjatë të ish-futbollistit, i cili ka mbajtur fanellën e Vllaznisë, Partizanit dhe Kombëtares shqiptare.
Sipas Becit, Esat Bushati e lidhi gjithë jetën e tij me futbollin dhe veçanërisht me ngjyrat kuqeblu të Vllaznisë, fanellën e së cilës e veshi që prej vitit 1947.
“Futbolli shkodran humbi një nga emrat e tij të respektuar, Esat Bushatin, ish-futbollistin e Vllaznisë, Partizanit dhe Kombëtares shqiptare”, shkruan kryebashkiaku i Shkodrës.
Beci thekson se figura të tilla janë pjesë e historisë sportive të qytetit dhe se kontributi i tyre mbetet pjesë e kujtesës së Shkodrës.
“Shkodra i ka të shtrenjtë njerëzit që kanë shkruar historinë e sportit të saj dhe Esat Bushati do të mbetet një prej tyre”, shprehet ai.
Në përfundim të mesazhit, Benet Beci i përcjell ngushëllimet familjes, të afërmve dhe gjithë familjes së madhe të futbollit shkodran.
“Ngushëllimet më të sinqerta familjes Bushati, të afërmve dhe gjithë familjes së madhe të futbollit shkodran. U prehsh në paqe, Esat!”, përfundon mesazhi i tij.
Ndarja nga jeta e Esat Bushatit shënon një humbje për sportin shkodran, ndërsa emri dhe kontributi i tij mbeten pjesë e historisë së futbollit shqiptar.