Për tri ditë me radhë, qyteti i Vlorës u shndërrua në kryeqendrën e boksit shqiptar, duke pritur Kampionatin Kombëtar ku morën pjesë 56 boksierë nga 10 ekipe të vendit. Finalet u zhvilluan paraditen e së dielës dhe sollën duele të forta e emocione sportive deri në fund.
Flamurtari u përfaqësua në finale me pesë pesha, Vllaznia me katër, ndërsa Tirana, Teuta dhe ekipi Gladiator morën pjesë me nga dy pesha secila. Në fund, Vllaznia konfirmoi edhe një herë dominimin e saj në arenën kombëtare, duke fituar titullin e 27-të kampion në historinë e klubit. Diferencat mes shkodranëve dhe Flamurtarit ishin tepër të ngushta, me rezultatin që u vendos vetëm nga pikët e boksierëve të vendeve të treta, pasi të dy ekipet kishin numër të barabartë kampionësh dhe nënkampionësh.
Çmimi për boksierin më të mirë të kampionatit iu dha Ariol Zenelit të Flamurtarit, i cili spikati me performancën dhe teknikën e tij gjatë gjithë garës.
Kampionati fillimisht ishte planifikuar të zhvillohej në Durrës, por për shkak të pamundësisë së bashkisë për ta organizuar në kohë, ngjarja u zhvendos vetëm një ditë para nisjes në Vlorë. Bashkia e Vlorës dhe Klubi Shumësportësh “Flamurtari” e morën përsipër organizimin dhe e realizuan me sukses në kohë rekord.
Përpara ndeshjeve finale, u mbajt edhe një ceremoni nderimi ku u akorduan dy certifikata mirënjohjeje për kontributin e tyre të çmuar në sportin e boksit. Të nderuar u shpallën trajneri i Flamurtarit, Gëzim Zeneli, dhe ish-sekretari i Federatës Shqiptare të Boksit, Xhevat Muhedini, me motivacionin:
“Me pasionin dhe profesionalizmin e tyre kanë lënë gjurmë të pashlyeshme në sportin e boksit dhe në formimin e brezave të rinj.”