Mladen Milinkoviç nuk është më trajneri i Partizanit. Klubi i kuq ka vendosur të ndërpresë bashkëpunimin me teknikun serb, një vendim që ishte paralajmëruar prej ditësh dhe që u konkretizua pas rezultateve jo të kënaqshme në kampionat.
Në pritje të emrit të ri që do të ulet në stolin e skuadrës, drejtimin e përkohshëm të ekipit do ta marrë Oltijon Kërnaja, i cili aktualisht është trajner i Partizanit B. Kërnaja iu bashkua klubit të kuq në korrik, pas largimit të Renaldo Kalarit, dhe ka bërë një nisje shumë pozitive me ekipin e dytë në Kategorinë e Dytë, duke regjistruar fitore ndaj Igëllit dhe Tomorit në dy javët e para.
Me këtë lëvizje, Partizani bëhet skuadra e parë në Superiore që ndryshon dy trajnerë brenda sezonit, pas shkarkimit më herët të Skënder Gegës, i cili u largua pas përfundimit të aventurës europiane të të kuqve.