Këto pesë javë të para, Elbasani ka kaluar një kalendar tepër të vështirë, duke u përballur me ekipe që kanë hyrë me objektiva të qarta për titull. Tre prej tyre – Egnatia, Dinamo dhe Partizani – ishin pjesë e “Final 4” sezonin e kaluar, ndërsa Flamurtari e Teuta kanë investuar fuqishëm këtë verë. Megjithatë, verdheblutë kanë dalë me sukses nga ky start i fortë: asnjë humbje dhe vendi i parë në klasifikim.
Tani, përballja me Vllazninë shihet si testi më i rëndësishëm për skuadrën e Ivan Gvozdenoviç. Shkodranët janë vetëm një pikë larg, dhe një rezultat pozitiv në “Loro Boriçi” do ta forconte ndjeshëm pozicionin e Elbasanit në krye.
Ky sezon duket ndryshe nga ai i kaluar. Në edicionin e shkuar, Elbasani nuk arriti të fitonte me rivalët e “Final 4”, ndërsa këtë herë ka mposhtur Dinamon dhe Partizanin, duke barazuar me kampionët e Egnatias. Për të plotësuar “hakmarjen”, mbetet vetëm Vllaznia – e vetmja që ende nuk është mposhtur në elitë. Një fitore në Shkodër do të thyen mallkimin e fundit dhe do të shënonte një moment historik për verdheblutë.