ELBASAN,19 maj 2026/Albania Express News/Në ambientet e Universiteti i Elbasanit u zhvillua edicioni i pestë i Konferencës Ndërkombëtare Studentore me temë “Inteligjenca Artificiale dhe e Ardhmja e Profesioneve”, një aktivitet akademik që bëri bashkë studentë, pedagogë, përfaqësues institucionesh dhe partnerë strategjikë, duke e kthyer universitetin në një qendër të rëndësishme debati shkencor dhe profesional mbi sfidat e së ardhmes.
Konferenca u fokusua te ndikimi i inteligjencës artificiale në transformimin e profesioneve, zhvillimin e tregut të punës, arsimin modern dhe përgatitjen e brezit të ri për një realitet gjithnjë e më të dixhitalizuar.
Në fjalën përshëndetëse, Zëvendësrektorja e universitetit, Blerina Papajani, theksoi se konferenca tashmë është shndërruar në një traditë të konsoliduar akademike, e cila prej pesë vitesh shërben si një forum ku zëri i studentëve dëgjohet, promovohet dhe vlerësohet me përgjegjësi institucionale. Ajo nënvizoi se Universiteti i Elbasanit vijon ta vendosë studentin në qendër të procesit akademik, kërkimor dhe profesional.
Pjesë e panelit ishin edhe përfaqësues të institucioneve dhe partnerëve strategjikë si Sara Bodo, Marsida Hyseni dhe Skevi Paralloi, të cilët ndanë reflektime mbi lidhjen mes arsimit dhe tregut të punës, rëndësinë e aftësive profesionale dhe mundësitë që u ofrohen të rinjve përmes projekteve dhe iniciativave zhvilluese.
Një nga momentet kryesore të aktivitetit ishte fjala e rektores së Universitetit të Elbasanit, Elvira Fetahu, e cila e cilësoi konferencën si një dëshmi konkrete të angazhimit të universitetit për të ndërtuar një institucion modern ku studentët janë në qendër të jetës akademike dhe kërkimore.
Rektorja Fetahu theksoi se punimet e prezantuara nga studentët pasqyrojnë jo vetëm përkushtimin akademik, por edhe kulturën universitare që nxit mendimin kritik, kërkimin shkencor dhe përfshirjen aktive në jetën shoqërore. Sipas saj, suksesi i studentëve nuk matet vetëm me rezultatet në auditor, por edhe me aftësinë për të krijuar, bashkëpunuar dhe kontribuar në zhvillimin e shoqërisë.
Në fjalën e saj, rektorja ndaloi edhe te nismat që universiteti ka ndërmarrë për forcimin e lidhjes mes arsimit dhe tregut të punës, duke përmendur Simpoziumin e Karrierës dhe Aftësive, praktikat profesionale, bashkëpunimet me institucionet publike e private dhe projektet konkrete që ndihmojnë studentët të orientohen drejt tregut të punës.
Ajo vlerësoi gjithashtu arritjet e Fakultetit të Biznesit dhe të Drejtësisë, duke kujtuar diplomimin e brezit të parë të studentëve të drejtësisë, pjesëmarrjen e studentëve në konkurse prestigjioze ndërkombëtare dhe suksesin e tyre në aktivitete si loja ndërkombëtare e bursës së Shtutgartit. Një rëndësi të veçantë iu kushtua edhe hapjes së Klinikës Ligjore Universitare në bashkëpunim me OSBE, e cila ofron ndihmë ligjore falas për qytetarët dhe njëkohësisht shërben si praktikë profesionale për studentët.
Në vijim, rektorja bëri të ditur se duke nisur nga viti akademik 2026–2027, Universiteti i Elbasanit do të ofrojë tetë programe studimi në gjuhën angleze, një hap që sipas saj synon rritjen e ndërkombëtarizimit dhe konkurrueshmërisë akademike të universitetit.
Në fokus të fjalës së saj ishte edhe zgjerimi i bashkëpunimeve ndërkombëtare përmes programeve Erasmus+, Jean Monnet, COST dhe Horizon Europe, si dhe pjesëmarrja e studentëve dhe stafit akademik në projekte mobiliteti dhe kërkimi shkencor. Ajo përmendi pjesëmarrjen e studentëve të Fakultetit të Biznesit dhe të Drejtësisë në Javën Ndërkombëtare të Trajnimit në PXL University of Applied Sciences and Arts në Belgjikë, me fokus inteligjencën artificiale.
Rektorja Fetahu foli gjithashtu për investimet në infrastrukturën universitare, duke përmendur ndërtimin e godinës së re të Fakultetit të Shkencave Mjekësore Teknike, ngritjen e Laboratorit të Logopedisë, Qendrës së Simulimit të Avancuar dhe Laboratorit EduGame në Fakultetin e Shkencave të Edukimit, të financuar nga Komisioni Evropian.
Një tjetër element i rëndësishëm i fjalës së saj ishte lidhja e universitetit me tregun e punës. Ajo theksoi bashkëpunimet me Bashkia Elbasan, Zyrën Rajonale të Punësimit, Këshillin e Qarkut, Banka e Shqipërisë dhe institucione të tjera, të cilat kanë krijuar ura konkrete bashkëpunimi për studentët. Sipas saj, rreth 80% e studentëve të diplomuar në Universitetin e Elbasanit janë të punësuar, tregues i cilësisë së formimit akademik dhe profesional që ofron institucioni.
Në përmbyllje të fjalës së saj, rektorja u drejtua studentëve me një mesazh frymëzues, duke theksuar se ata janë brezi që do të jetojë në një botë të formësuar nga teknologjia dhe inteligjenca artificiale, por se roli i inteligjencës njerëzore, etikës, mendimit kritik dhe vizionit mbetet i pazëvendësueshëm në ndërtimin e një shoqërie më të mirë.
Konferenca vijoi me prezantime shkencore, diskutime akademike dhe shkëmbime idesh mes studentëve dhe pedagogëve, duke konfirmuar edhe një herë rolin e Universitetit të Elbasanit si një institucion që promovon dijen, inovacionin dhe zhvillimin profesional të të rinjve shqiptarë.