ELBASAN, 2 shtator 2026 / Albania Express News / – Universiteti i Elbasanit “Aleksandër Xhuvani” ka çelur Shkollën Verore Ndërkombëtare të Studimeve Mesdhetare – EISMS 2026, një nismë akademike që bashkon studiues, pedagogë dhe pjesëmarrës nga vende dhe institucione të ndryshme ndërkombëtare.
Ceremonia e hapjes u zhvillua në një atmosferë të dedikuar shkëmbimit të ideve dhe bashkëpunimit akademik, duke e vendosur Universitetin e Elbasanit në qendër të një dialogu ndërkombëtar mbi çështje me rëndësi për hapësirën mesdhetare.
Në fjalën e saj, Zëvendësrektorja e Universitetit të Elbasanit, Prof. as. Dr. Blerina Papajani, vlerësoi rëndësinë e kësaj nisme, duke e cilësuar atë si një hapësirë të rëndësishme për dialogun, shkëmbimin akademik dhe forcimin e bashkëpunimit ndërkombëtar.
Një prej veçorive kryesore të EISMS 2026 është karakteri i saj ndërdisiplinor. Programi përfshin një gamë të gjerë tematikash, duke nisur nga diplomacia dhe siguria, e deri te trashëgimia kulturore, dialogu ndërkulturor, politika, arti dhe letërsia.
Gjatë panelit të zhvilluar në kuadër të ceremonisë, studiuesit dhe të ftuarit prezantuan kumtesat e tyre, duke sjellë perspektiva dhe qasje të ndryshme mbi temat e përzgjedhura.
Kontributet e pjesëmarrësve krijuan një hapësirë të pasur për diskutim dhe reflektim, duke nxitur shkëmbimin e përvojave dhe ideve mes akademikëve dhe pjesëmarrësve nga vende të ndryshme.
EISMS 2026 synon të shërbejë jo vetëm si një forum akademik, por edhe si një urë bashkëpunimi ndërmjet institucioneve dhe studiuesve, duke promovuar dialogun ndërkulturor dhe qasjet ndërdisiplinore ndaj sfidave dhe zhvillimeve në hapësirën mesdhetare.
Organizimi i kësaj shkolle verore i jep një dimension të rëndësishëm ndërkombëtar jetës akademike në Elbasan dhe përforcon rolin e Universitetit “Aleksandër Xhuvani” në zhvillimin e bashkëpunimeve dhe aktiviteteve akademike me karakter ndërkombëtar.
