Në kuadër të orientimit profesional dhe forcimit të lidhjes mes formimit akademik dhe praktikës profesionale, Departamenti i Shkencave Sociale dhe Edukimit Qytetar, pranë Fakultetit të Shkencave të Edukimit të Universitetit “Aleksandër Xhuvani” Elbasan, organizoi një bashkëbisedim me temë “Roli i punonjësit social në sektorin e shëndetësisë”, me pjesëmarrjen e maturantëve nga gjimnazet e qytetit të Elbasanit.
Gjatë aktivitetit, të rinjtë u njohën më nga afër me profesionin e Punës Sociale, rëndësinë e tij në sistemin shëndetësor, si dhe me ofertën akademike që ofron Departamenti i Shkencave Sociale dhe Edukimit Qytetar në Universitetin “Aleksandër Xhuvani”.
Një kontribut te veçantë në këtë bashkëbisedim dha znj. Zheni Bebi Gjergji, Drejtoreshë e Qendrës Spitalore “Xhaferr Kongoli” Elbasan, e cila theksoi se, në një kohë kur shëndeti përkufizohet jo vetëm si mungesë e sëmundjes, por si mirëqenie fizike, mendore dhe sociale, punonjësi social zë një rol kyç në qasjen holistike ndaj pacientit.
Gjatë fjalës së saj, znj. Gjergji ndau përvojën profesionale dhe qasjen e Shërbimit Social në Shëndetësi Publike (SRE), duke vënë në dukje rëndësinë e bashkëpunimit ndërdisiplinar në mjedisin spitalor, si dhe sfidat konkrete që shoqërojnë punën në terren. Ajo theksoi gjithashtu nevojën për forcimin e rolit të punonjësit social dhe krijimin e më shumë mundësive për praktika profesionale për studentët.
Diskutimet me punonjës socialë të fushës së shëndetësisë sollën në vëmendje mesazhe të rëndësishme mbi rëndësinë e mbështetjes psikosociale si pjesë integrale e kujdesit shëndetësor.
Universiteti “Aleksandër Xhuvani” Elbasan vijon të angazhohet në përmbushjen e misionit të tij për t’i shërbyer komunitetit, duke ndërlidhur formimin akademik me nevojat reale të shoqërisë dhe duke nxitur iniciativa që forcojnë rolin e profesionistëve socialë në sektorin e shëndetësisë.
