GRAMSH, 7 nëntor 2026 / Albania Express News / – Gramshi ka hyrë në një etapë të re të zhvillimit të futbollit, me inaugurimin e stadiumit të ri, një investim i rëndësishëm në infrastrukturën sportive të qytetit, i realizuar në bashkëpunim mes Federatës Shqiptare të Futbollit (FSHF) dhe Bashkisë Gramsh.
Ceremonia inauguruese u zhvillua këtë të shtunë, në praninë e Presidentit të FSHF-së, Armand Duka, dhe kryetarit të Bashkisë Gramsh, Besion Ajazi, të cilët vlerësuan rëndësinë e këtij projekti për të ardhmen e sportit, futbollin e moshave dhe krijimin e kushteve më të mira për komunitetin sportiv të qytetit.
Stadiumi i ri përfaqëson një investim me rëndësi për Gramshin, duke krijuar një hapësirë moderne për zhvillimin e aktiviteteve futbollistike, stërvitjen e ekipeve dhe organizimin e ndeshjeve. Përfituesit kryesorë të kësaj infrastrukture do të jenë fëmijët, të rinjtë dhe futbollistët që përfaqësojnë qytetin në kampionate të ndryshme.
Duka: Gramshi e meriton këtë investim, fëmijët duhet të kenë mundësi të barabarta
Në fjalën e tij gjatë ceremonisë, Presidenti i FSHF-së, Armand Duka, shprehu kënaqësinë për përfundimin e këtij projekti, duke falënderuar Bashkinë Gramsh dhe kompaninë që realizoi punimet.
Duka theksoi se investimi është pjesë e strategjisë së Federatës për zhvillimin e futbollit në të gjithë vendin, duke garantuar mundësi të barabarta për fëmijët, pavarësisht qytetit apo zonës ku jetojnë.
Ai iu përgjigj gjithashtu kritikave të mundshme për zgjedhjen e Gramshit si përfitues i këtij investimi, duke nënvizuar se qyteti ka një traditë sportive dhe një komunitet tifozësh që e meriton një infrastrukturë të tillë.
“Ky projekt është vazhdim i strategjisë së Federatës Shqiptare të Futbollit, për të qenë pranë dhe për t’i dhënë mundësi të barabarta, kudo e kujtdo, fëmijëve që duan të luajnë futboll”, u shpreh Duka.
Më tej, kreu i FSHF-së deklaroi:
“Ky investim në Gramsh është sepse e meritojnë fëmijët e Gramshit, ky investim në Gramsh është sepse e meritojnë tifozët e këtij qyteti, të cilët e duan futbollin dhe janë të apasionuar pas tij”.
Presidenti i Federatës falënderoi gjithashtu trajnerët e Gramshit dhe zonave përreth për kontributin e tyre ndër vite, si dhe prindërit që mbështesin vazhdimisht angazhimin e fëmijëve në sport.
Besion Ajazi: Një ëndërr e kahershme e gramshiotëve bëhet realitet
Kryetari i Bashkisë Gramsh, Besion Ajazi, e cilësoi inaugurimin e stadiumit një ditë të veçantë për qytetin, pasi bëhet fjalë për një projekt të shumëpritur nga breza të tërë sportistësh, trajnerësh dhe tifozësh.
Në shenjë vlerësimi për mbështetjen e dhënë, Ajazi i dhuroi Presidentit të FSHF-së, Armand Duka, një fanellë simbolike të dedikuar për të.
Gjatë fjalës së tij, kryebashkiaku theksoi se stadiumi është rezultat i bashkëpunimit me Federatën Shqiptare të Futbollit dhe se investimet në infrastrukturën sportive do të vijojnë edhe në të ardhmen.
“Ky stadium ka qenë një ëndërr e kahershme, ndër breza dhe dekada, e shumë trajnerëve dhe futbollistëve. Sot jemi në një realitet të ri, të bërë të mundur falë mbështetjes bujare të Presidentit të Federatës Shqiptare të Futbollit”, deklaroi Ajazi.
Ai bëri të ditur se Bashkia Gramsh synon të bashkëpunojë me FSHF-në edhe për ndërtimin e fushave ndihmëse, të cilat do të krijojnë më shumë mundësi për stërvitjen dhe përgatitjen e grupmoshave të ndryshme.
Sipas Ajazit, aktualisht në Gramsh janë më shumë se 250 fëmijë të angazhuar në futboll, ndërsa qyteti ka ekipe të grupmoshave U-13, U-15, U-17 dhe ekipin e të rriturve.
Kryebashkiaku nënvizoi se stadiumi nuk duhet të shihet vetëm si një terren për ekipin e parë, por si një hapësirë sportive për të gjithë fëmijët dhe të rinjtë e qytetit.
“Uniforma Ime”, një tjetër mbështetje për mbi 250 fëmijët e futbollit në Gramsh
Inaugurimi i stadiumit u shoqërua edhe me nisjen e edicionit të ri të projektit të Federatës Shqiptare të Futbollit, “Uniforma Ime”, një nismë që synon të mbështesë drejtpërdrejt fëmijët e angazhuar në futboll.
Nëpërmjet këtij projekti, fëmijët që aktivizohen në shoqatat dhe akademitë e Shoqatës Rajonale të Futbollit Elbasan do të pajisen falas me uniforma dhe bazë materiale sportive.
Kjo mbështetje synon të lehtësojë barrën financiare për familjet dhe t’u krijojë fëmijëve kushte më të mira për t’u përqendruar te stërvitja, loja dhe zhvillimi i aftësive të tyre sportive.
Presidenti Armand Duka e cilësoi projektin “Uniforma Ime” pjesë të së njëjtës strategji me investimet në infrastrukturë, duke theksuar se qëllimi është që çdo fëmijë të ketë mundësinë të ndjekë ëndrrën e tij sportive.
Sipas tij, stadiumi i ri dhe pajisjet sportive do t’u japin fëmijëve të Gramshit mundësi të barabarta me bashkëmoshatarët e tyre në qytetet e tjera të Shqipërisë.
Gramshi investon te brezi i ri dhe e ardhmja e futbollit
Përtej ceremonisë inauguruese, stadiumi i ri përfaqëson një mundësi të rëndësishme për ringritjen dhe zhvillimin e mëtejshëm të futbollit në Gramsh.
Me më shumë se 250 fëmijë të angazhuar në grupmosha të ndryshme, rikthimin e ekipit U-17 dhe aktivitetin e ekipit të të rriturve, qyteti ka një bazë sportive që kërkon mbështetje të vazhdueshme infrastrukturore dhe organizative.
Bashkëpunimi mes Bashkisë Gramsh dhe FSHF-së synon të krijojë kushte që futbolli të mos mbetet vetëm një pasion, por të shndërrohet edhe në një mundësi reale edukimi, formimi dhe zhvillimi për brezat e rinj.
Në përfundim të ceremonisë, mesazhi i përbashkët i drejtuesve të futbollit dhe pushtetit vendor ishte i qartë: stadiumet dhe terrenet sportive nuk janë vetëm investime në infrastrukturë, por investime në fëmijët, komunitetin dhe të ardhmen e sportit shqiptar.
Gramshi tashmë ka stadiumin e ri. Sfida e radhës është ta mbushë atë me fëmijë, futboll, emocione dhe suksese sportive.
