Mesfushori i talentuar i Napolit, Luis Hasa, ka vendosur të përfaqësojë Shqipërinë, duke lënë pas mundësinë e lojës për Italinë, ku ishte pjesë e ekipeve të moshave deri në U-21. Ky vendim është zyrtarizuar nga FIFA.
22-vjeçari aktualisht është i huazuar te Carrarese në Serinë B, ku ka shkëlqyer me 25 paraqitje, duke shënuar 5 gola dhe dhuruar 3 asistime. Performanca e tij e ka rikthyer vëmendjen e tifozëve shqiptarë dhe trajnerëve të kombëtares.
Hasa ka filluar karrierën te moshat e Juventusit, ndërsa më pas kaloi te Lecce, ku pati vetëm një paraqitje në Kupën e Italisë. Pas këtij kalimi, ai iu bashkua Napolit, ku ishte pjesë e skuadrës kampione nën drejtimin e Antonio Contes, por pjesën më të madhe të sezonit qëndroi në stol.
Zgjedhja për të luajtur për Shqipërinë është një lajm i mirë për Kombëtaren, e cila fiton një mesfushor të ri me eksperiencë në klubet e futbollit italian.