GRAMSH ,31 korrik 2026/Albania Express News/-Tre persona janë shpëtuar nga forcat e Shërbimit të Mbrojtjes nga Zjarri dhe Shpëtimi të Bashkisë Gramsh, pasi traktori me të cilin po lëviznin u bllokua në lumin Devoll, në vendin e quajtur Bishti i Nartës.
Sipas informacioneve, menjëherë pas marrjes së njoftimit, ekipet zjarrfikëse u nisën drejt vendngjarjes dhe ndërhynë për nxjerrjen e personave që ndodheshin në rrezik.
Falë reagimit të shpejtë të efektivëve, u shpëtuan një i moshuar, nipi i tij dhe drejtuesi i traktorit. Ndërkohë, mjeti bujqësor ishte zhytur në ujë deri në lartësinë e kabinës, duke e bërë situatën mjaft të rrezikshme.
Shërbimi Zjarrfikës i Gramshit apelon edhe një herë për qytetarët që të mos futen me mjete në shtratin e lumit Devoll, pasi prurjet e ujit nga diga e Moglicës mund të rriten papritur dhe të krijojnë rrezik serioz për jetën dhe mjetet.
Autoritetet u bëjnë thirrje banorëve të tregojnë kujdes maksimal dhe të respektojnë paralajmërimet, për të shmangur ngjarje të ngjashme.