Ivan Gvozdenoviç vazhdon të shkruajë historinë me AF Elbasanin, teksa është shpallur trajneri më i mirë i muajit mars në “Abissnet Superiore”, një vlerësim që konfirmon formën fantastike të verdhebluve në kampionat.
Përzgjedhja është bërë nga Drejtoria Teknike e FSHF, ndërsa trofeu iu dorëzua nga Alban Tafaj, specialist i Departamentit të Edukimit në FSHF, pak çaste përpara nisjes së sfidës Dinamo City – AF Elbasani në stadiumin “Air Albania”, duke i dhënë edhe më shumë peshë këtij momenti për teknikun serb.
Muaji mars rezultoi vendimtar për ecurinë e Elbasanit, që nën drejtimin e Gvozdenoviç arriti rezultate mbresëlënëse. Verdheblutë siguruan dy fitore të rëndësishme përballë Tiranës dhe Flamurtarit, ndërsa morën një barazim me peshë ndaj Egnatias, duke treguar stabilitet dhe karakter në ndeshje të vështira.
Ky çmim është një reflektim i punës së palodhur të trajnerit dhe disiplinës që ai ka instaluar në skuadër, duke e kthyer AF Elbasanin në një nga ekipet më konkurruese dhe pretendente serioze për kreun e renditjes.
Me këtë ritëm dhe besim në rritje, Elbasani duket gati të luftojë deri në fund për objektivat madhorë, ndërsa Gvozdenoviç po shndërrohet në një nga protagonistët absolutë të këtij sezoni në elitën e futbollit shqiptar.