Adrien Rabiot ka pasur një ndikim të menjëhershëm te Milan pas transferimit nga Marseille në ditët e fundit të merkatos.
Mesfushori francez, i kërkuar me ngulm nga Massimiliano Allegri — trajneri që e kishte edhe te Juventusi — është tashmë një titullar i padiskutueshëm në qendrën e mesfushës, ku ka sjellë fizikalitet, përvojë dhe lidership.
“Të vesh fanellën e Milanit pas pesë viteve te Juventusi nuk është pak,” tha Rabiot për Gazzetta dello Sport. “Kemi cilësinë për të luftuar për Scudetton. Allegri më kërkoi sepse e di që mund të ndihmoj të rinjtë me përvojën time, si në stërvitje, ashtu edhe në ndeshje.”
Rabiot, i njohur për natyrën e tij të drejtpërdrejtë, nuk ngurroi të bënte një krahasim mes modelit të disiplinës, Luka Modric, dhe shokut të tij të ekipit, Rafael Leao:
“Modric është një frymëzim. Ka pasion të jashtëzakonshëm, stërvitet fort dhe luan me dëshirë edhe në moshën 40-vjeçare. Kjo është ajo që i mungon Leao-s. Ai ka talent të madh, por në moshën 26-vjeçare nuk është më ‘i ri’. Duhet të vendosë nëse dëshiron të bëhet i madh apo do të mjaftohet me atë që është.”
Sipas burimeve pranë klubit, pas ndeshjes së fundit ndaj Juventusit ka pasur një moment tensioni në dhomën e zhveshjes. Allegri, i zemëruar me qasjen e Leao-s gjatë ndeshjes, ndërhyri ashpër para gjithë skuadrës:
“Tani askush të mos flasë. Leao, dua të jesh më i përqendruar! Jo vetëm në sulm, por edhe në detyrat që të kërkoj!” — thuhet të ketë deklaruar tekniku italian.
Raportohet se nuk ka qenë një përplasje personale, por një lëvizje e qëllimshme për të “tronditur” sulmuesin portugez, i cili së fundmi është vënë në shënjestër të kritikave për mungesë intensiteti.
