TIRANË,13 maj 2026/Albania Express News/Futbolli shqiptar dorëzon këtë të mërkurë një prej trofeve të rëndësishëm të tij për sezonin 2025/2026.
Në orën 19:00 në Air Albania Stadium do të luhet finalja e Kupës së Shqipërisë mes Egnatias dhe Dinamos, dy skuadra që e kanë fituar këtë trofe në dy edicionet e fundit e për më tepër diskutuan mes tyre edhe finalen e vitit të kaluar dhe ku Dinamo ajo që e ngriti trofeun në atë moment. Për skuadrën rrogozhinase finalja e sotme është momenti për të marrë revanshin dhe të fitoje këtë trofe.
Për të arritur në këtë finale, Dinamo eliminoi në gjysmëfinale Vllazninë me rezultatin e përgjithshëm 2-1, barazoi 1-1 në sfidën e parë në Tiranë dhe fitoi të 1-0 ndeshjen e dytë në Shkodër. Ndërsa Egnatia eliminoi Elbasanin vetëm pas serisë së penalltive pas një ekuilibri të madh në të dyja ndeshjet.
Finalja e mbrëmjes së sotme do te jete ndeshja e 34 në histori mes Egnatias dhe Dinamos. Bilanci i 33 ndeshjeve të para anon tërësisht nga ana e skuadrës që tashmë drejtohet nga Nevil Dede teksa ka 16 fitore kundrejt 7 të Dinamos, ndërsa 10 ndeshje të tjera janë mbyllur në barazim. Po kështu edhe bilanci i golave të shënuar është në favor të Egnatias, 39 finalizime për rrogozhinasit, kundrejt 24 të Dinamos
Në ‘Air Albania Stadium’ pritet një sfidë me rivalitet dhe emocionuese për trofeun e Kupës së Shqipërisë, një sfidë që i paraprin fazës së Final Four të kampionatit që do të mbahet në 16-31 maj dhe ku Egnatia dhe Dinamo bashkë me Vllazninë dhe Elbasanin do të përplasen mes tyre për titullin kampion të vendit.