Samuel Eto, ikonë e futbollit afrikan dhe president i Federatës së Futbollit të Kamerunit (FECAFOOT), ndodhet në qendër të një skandali që mund të kërcënojë të ardhmen e futbollit kamerunas vetëm disa muaj para Kupës së Botës 2026.
Një grup profesionistësh, i udhëhequr nga avokati ndërkombëtar Emmanuel Nsahlai, ka paraqitur ankesa zyrtare pranë Komitetit të Etikës së FIFA-s, Konfederatës së Futbollit Afrikan (CAF) dhe Ministrisë së Sportit dhe Edukimit Fizik të Kamerunit. Ata e akuzojnë Eto-n për menaxhim të dyshimtë dhe shkelje të tjera serioze.
Akuzat përfshijnë korrupsion, përfshirje të dyshuar në manipulimin e ndeshjeve të divizionit të dytë të Kamerunit, mashtrim tatimor në Spanjë në vlerën e 4.4 milionë dollarëve, shtypje të opozitës brenda federatës, manipulim zgjedhor dhe konflikt interesi me kompaninë ruse të basteve 1xBet, si dhe “zhdukjen” e 1.5 milionë dollarëve nga ndeshjet miqësore.
“Ky nuk është një sulm ndaj Eto si lojtar, karriera e tij është e paprekshme. Bëhet fjalë për shpëtimin e qeverisjes së futbollit kamerunas dhe rivendosjen e vlerave të integritetit dhe lojës së ndershme,” tha Nsahlai.
Eto, i zgjedhur president në vitin 2021 me premtimin për transparencë, ka qenë tashmë në qendër të polemikave. Në vitin 2024, FIFA e pezulloi për sjellje ofenduese gjatë Kupës së Botës për Femra U20, ndërsa më parë u gjobit për kontratën e tij me 1xBet. Pas eliminimit të Kamerunit nga Kupa e Kombeve të Afrikës, ai njoftoi dorëheqjen, e cila u refuzua nga federata. Tani, presioni ndërkombëtar rrit rrezikun që mandati i tij të përfundojë para kohe.