TIRANË ,18 gusht 2026/Albania Express News/-Në 84-vjetorin e lindjes së një prej ikonave të komentit sportiv shqiptar, Rrok Preçi, është zhvilluar një ceremoni e veçantë vlerësimi për kontributin e tij të jashtëzakonshëm në gazetarinë sportive dhe në mikrofonin e Radio Tiranës.
Gazetari i mirënjohur sportiv, Defrim Methasani, ka ndarë në rrjetet sociale emocionet e kësaj dite, duke bërë me dije se Rrok Preçi është nderuar me titullin “Mirënjohje Nderi”, një vlerësim i akorduar me propozim të Unionit të Gazetarëve Sportivë në Shqipëri.
Çmimi iu dorëzua në Tiranë nga Edmond Thaçi, President i gazetarëve sportivë në Kosovë, duke i dhënë kështu një tjetër dimension marrëdhënieve dhe bashkëpunimit mes gazetarëve sportivë shqiptarë dhe atyre të Kosovës.
Në postimin e tij, Methasani e cilëson këtë moment si një vlerësim të merituar për një figurë që ka lënë gjurmë të pashlyeshme në historinë e komentit sportiv shqiptar.
Kontributi i Rrok Preçit në mikrofonin sportiv shtrihet përgjatë më shumë se katër dekadave, gjatë të cilave zëri i tij është bërë pjesë e pandarë e emocioneve të mijëra sportdashësve shqiptarë. Përmes Radio Tiranës, ai ka përcjellë ndeshje dhe ngjarje sportive nga qytete të ndryshme të vendit, duke u kthyer në një prej zërave më karakteristikë të komentimit sportiv shqiptar.
Nga Laçi në Tiranë, Shkodër, Durrës e Vorë, e deri në stadiumet e qyteteve të tjera të Shqipërisë, komentimi i Preçit ka shoqëruar breza të tërë tifozësh dhe ka mbetur në kujtesën e publikut si një nga zërat emblemë të radios sportive shqiptare.
Por vlerësimi nuk lidhet vetëm me karrierën e tij të gjatë në mikrofon. Një rëndësi të veçantë ka edhe roli që Rrok Preçi ka luajtur në forcimin e urave të bashkëpunimit mes gazetarisë sportive shqiptare dhe asaj të Kosovës.
Sipas Methasanit, pikërisht ky kontribut shumëdimensional ka qenë një prej arsyeve që çmimi “Mirënjohje Nderi” t’i akordohej mjeshtrit të mikrofonit sportiv.
Ky vlerësim merr një domethënie edhe më të veçantë për faktin se i është dhënë në një moment të rëndësishëm të jetës së tij, pas një periudhe të vështirë shëndetësore që ka kaluar gjatë tre viteve të fundit.
Për kolegët dhe miqtë e tij, ceremonia nuk ishte thjesht një dorëzim çmimi, por një homazh për një jetë të përkushtuar ndaj sportit, radios dhe gazetarisë.
“Edhe 100 djalit të Kelmendit dhe Kurbinit”, shkruan Methasani, duke e cilësuar Preçin si “zërin kumbues të Radio Tiranës”, i cili për më shumë se 40 vite u ka dhuruar sportdashësve emocione të pafundme përmes futbollit.
Me rastin e 84-vjetorit të lindjes edhe Albania Express News i përcjell Rrok Preçit urimet më të përzemërta, duke i uruar shëndet, jetë të gjatë dhe sa më shumë vite pranë familjes, miqve dhe komunitetit sportiv.
Njëkohësisht, i bashkohemi vlerësimit për kontributin e tij të jashtëzakonshëm në gazetarinë sportive shqiptare. Për dekada me radhë, zëri i Rrok Preçit ka shoqëruar emocionet e futbollit dhe ka mbetur pjesë e kujtesës së sportdashësve shqiptarë.
Gëzuar 84-vjetorin, mjeshtër Rrok Preçi! Edhe 100 vite me shëndet, gëzim dhe respekt!