Gjyqtarja e Gjykatës së Posaçme kundër Korrupsionit dhe Krimit të Organizuar, Irena Gjoka, ka rrëzuar kërkesën e ish-presidentit të Republikës, Ilir Meta, për shuarjen e masës së sigurisë “arrest me burg”.
Meta, përmes avokatit të tij Kujtim Cakrani, kishte kërkuar lirimin nga qelia me argumentin se janë shkelur afatet ligjore të paraburgimit dhe se masa e sigurisë duhet të hiqet, por kërkesa nuk është pranuar nga gjykata. Sipas mbrojtjes, vendimi është dhënë pa asnjë arsyetim të detajuar, ndërsa avokati e cilësoi si një vendim të pabazuar në ligj.
Ish-presidenti ndodhet në burg prej tetorit të vitit të kaluar, pas vendimit të Gjykatës së Posaçme që caktoi masën “arrest me burg” në kuadër të hetimeve të zhvilluara nga Prokuroria e Posaçme (SPAK). Meta akuzohet për tre vepra penale: “korrupsion pasiv i funksionarëve të lartë shtetërorë”, “pastrim parash” dhe “fshehje të pasurisë.”
Më 28 korrik, SPAK mbylli hetimet shumëmuajshe dhe në fund të gushtit dërgoi dosjen për gjykim, duke bashkuar në një të vetme tre çështje të bujshme: aferën CEZ–DIA, lobimin e LSI-së në SHBA dhe hetimin pasuror të familjes Meta-Kryemadhi.
Në këtë dosje është përfshirë edhe ish-kryetarja e Lëvizjes Socialiste për Integrim, Monika Kryemadhi, e cila përballet me të njëjtat akuza si ish-bashkëshorti i saj. Hetimet ndaj çiftit janë në fazën e gjykimit, ndërsa procesi pritet të zhvillohet në javët në vijim në Gjykatën e Posaçme.