Agjencia Shtetërore e Kadastrës ka nisur prej më shumë se një muaji procesin e Regjistrimit Fillestar të pasurive të paluajtshme në qarkun e Elbasanit.
Ky projekt po zhvillohet në gjashtë fshatra të zonës, me synimin për të krijuar një regjistër kadastral të saktë dhe të besueshëm, që u garanton banorëve mundësinë për t’u pajisur me dokumentacion të plotë pronësie.
Ekipet janë të pranishme në terren, ku informojnë qytetarët dhe mbledhin dokumentacionin ekzistues që vërteton pronësinë e tyre.
Paralelisht, për çdo pasuri po kryhen matje me teknologji bashkëkohore, duke siguruar saktësi dhe cilësi maksimale në të dhënat që do të regjistrohen.
ASHK vlerëson bashkëpunimin e banorëve të zonës, duke theksuar se kontributi i tyre është thelbësor për një proces sa më të plotë dhe transparent.