Futbolli shpesh krijon histori që duken të pabesueshme. Ka raste kur rastësitë lidhen aq shumë mes tyre, sa të japin ndjesinë se gjithçka është shkruar nga vetë fati. Pikërisht kjo po ndodh me Elbasanin në këtë fundsezoni dramatik, aty ku verdheblutë vazhdojnë të ëndërrojnë titullin kampion pas dy dekadash. Teksa kampionati po shkon drejt javës së fundit, në qytetin e Elbasanit shumëkush ka nisur të bëjë krahasime me sezonin historik 2005-2006, kur skuadra verdheblu u shpall kampione e Shqipërisë. Dhe ajo që e bën edhe më të veçantë këtë histori është fakti se protagonistët kryesorë të asaj kohe janë rikthyer sërish në qendër të fatit të klubit. I njëjti ekip që lufton për titullin. E njëjta ëndërr për të rikthyer lavdinë. Dhe po të njëjtët emra që 20 vite më parë i dhanë Elbasanit suksesin më të madh në historinë moderne të klubit. Vetëm se këtë herë, në role krejt të kundërta.
Nevil Dede, kapiteni i titullit që tani mund t’i shuajë ose t’i mbajë gjallë ëndrrat verdheblu
Në sezonin 2005-2006, Nevil Dede ishte lideri absolut i Elbasanit. Kapiteni emblemë, njeriu që udhëhiqte skuadrën në fushë dhe simboli i karakterit të atij grupi kampion. Sot, pas 20 vitesh, ai ndodhet sërish në qendër të historisë së titullit verdheblu, por në anën tjetër të garës. Dede është pjesë e Egnatias, skuadrës që lufton direkt me Elbasanin për trofeun. Ironia është e jashtëzakonshme: njeriu që dikur ngriti titullin me verdheblutë, sot mund të bëhet pengesa më e madhe për ëndrrën e qytetit. Për më tepër, edhe për vetë Deden kjo është një mundësi historike. Ai ka shansin e parë të madh që të dalë kampion si trajner apo pjesë e stafit teknik me Egnatian. Një sukses personal shumë i rëndësishëm në karrierën e tij. Por, në të njëjtën kohë, nëse Egnatia gabon ndaj Dinamos, atëherë në mënyrë indirekte edhe vetë Dede mund t’i japë një “dorë” Elbasanit për t’u rikthyer kampion. Pra, edhe pse në kahun tjetër të historisë, emri i tij vazhdon të mbetet i lidhur ngushtë me fatin e klubit verdheblu.
Ilir Daja, trajneri i lavdisë që mund ta shpallë sërish kampion Elbasanin
Nëse Dede ishte lideri në fushë, atëherë Ilir Daja ishte arkitekti i suksesit historik të vitit 2005-2006. Trajneri që ndërtoi skuadrën kampione dhe i dha Elbasanit një identitet fitues. Edhe sot, pas dy dekadash, Ilir Daja ndodhet përsëri në një moment vendimtar për fatin e Elbasanit. Vetëm se këtë herë nga pankina e Dinamos. Paradoksi është i pabesueshëm. Njeriu që i dha Elbasanit titullin kampion mund të ndikojë sërish që trofeu të rikthehet në qytet. Nëse Dinamo ndal Egnatian dhe Elbasani fiton ndaj Vllaznisë, atëherë verdheblutë do të shpallen kampionë të Shqipërisë. Kështu, Ilir Daja mund të bëhet sërish një nga figurat kyçe të suksesit të Elbasanit, edhe pse këtë herë si trajner i një tjetër skuadre.
Stadiumi që mund të bëhet “aleati” i Elbasanit
Një tjetër detaj që e bën edhe më të fortë këtë lidhje me të kaluarën është vetë stadiumi ku do të luhet ndeshja vendimtare mes Egnatias dhe Dinamos. Nëse Egnatia mposhtet nga Dinamo dhe njëkohësisht Elbasani fiton ndaj Vllaznisë në “Air Albania Stadium”, atëherë verdheblutë do të shpallen kampionë të Shqipërisë pas 20 vitesh. Dhe këtu lind një tjetër simbolikë e fortë. Stadiumi ku do të luhet sfida e Egnatias mund të kthehet në një “aleat” të Elbasanit në rrugën drejt titullit, pasi kjo sfidë do të luhet në “Elbasan Arena”, dikur “Ruzhdi Bizhuta”. Në qytetin e Elbasanit, shumë tifozë po e shohin edhe këtë si një tjetër “shenjë” të fatit. Sikur gjithçka po lidhet në mënyrë perfekte me rikthimin e titullit pas dy dekadash. Nga njëra anë, Elbasani duhet të bëjë detyrën e vet ndaj Vllaznisë. Nga ana tjetër, shpresat verdheblu do të kalojnë edhe nga stadiumi ku Dinamo do të tentojë të ndalë Egnatian. Dhe pyetja që po bëjnë shumë tifozë është: a do t’i japë edhe stadiumi një “dorë” Elbasanit për të rrëzuar Egnatian?
Rastësi apo një shenjë e fatit?
Ndoshta gjithçka është vetëm një rastësi e madhe sportive. Ndoshta është thjesht mënyra si futbolli di të rikthejë historitë dhe protagonistët aty ku askush nuk e mendon. Por për tifozët e Elbasanit, kjo histori ka nisur të duket më shumë si një shenjë. Një rikthim simbolik i të njëjtëve njerëz që e bënë dikur kampion klubin dhe që tani, secili në mënyrën e vet, mund të ndihmojnë sërish që titulli të rikthehet në qytet. Nevil Dede, Ilir Daja, stadiumi dhe vetë Elbasani. Të gjithë protagonistë të një historie që duket sikur po mbyll një rreth të nisur ekzaktësisht 20 vite më parë. Dhe nëse verdheblutë arrijnë ta realizojnë këtë mrekulli sportive, atëherë sezoni aktual nuk do të mbahet mend vetëm për titullin, por për mënyrën e pabesueshme se si historia u rikthye sërish në të njëjtën pikë…