Kryeministri Edi Rama ka reaguar pas një statusi të Lëvizjes Vetëvendosje, e cila e akuzoi si një ndër mbështetësit dhe lobistët kryesorë për krijimin e Gjykatës Speciale. Përmes një postimi në rrjete sociale, Rama u shpreh se qëndrimet e tij janë keqinterpretuar dhe se Vetëvendosja po ngatërron raportet institucionale mes Shqipërisë dhe Kosovës me çështje të politikës së brendshme.
“Lëvizja Vetëvendosje më paska kushtuar një çarçaf të gjatë, ku shkruan se përpara 10 vjetësh unë paskam qenë pro, kurse ajo paska qenë kundër Gjykatës Speciale… Ndërkohë unë e kam denoncuar farsën ndaj Hashim Thaçit e të tjerëve sa herë ka qenë nevoja, ndërsa Lëvizja dihet se sa ka lëvizur në atë drejtim,” shkruan Rama.
Ai theksoi se Gjykata Speciale nuk u ngrit për të ndëshkuar drejtuesit politikë e ushtarakë të UÇK-së, por për të hetuar pretendimet për trafik organesh, duke theksuar se “nuk ka qenë asnjëherë qëllimi i saj të marrë peng Presidentin e Republikës së Kosovës”.
Rama shtoi gjithashtu se nuk është as organizator, as folës i protestës gjithëkombëtare “Drejtësi për Çlirimtarët”, ndonëse e mbështet plotësisht nismën. “Do t’i bashkohesha si pjesëmarrës i thjeshtë, nëse nuk do të isha i vetëdijshëm se çdo politizim, me dashje ose pa dashje, do të dëmtonte qëllimin dhe popullaritetin e saj,” thekson ai.
