TIRANË ,03 gusht 2026/Albania Express News/-Dinamo City ka mësuar rivalin e mundshëm në fazën “play-off” të UEFA Conference League, nëse arrin të kalojë me sukses turin e tretë kualifikues.
Shorti i hedhur nga UEFA ka rezervuar një sfidë shumë të fortë për skuadrën shqiptare. Në rast kualifikimi, Dinamo do të përballet me humbësen e çiftit të Europa League, ku bën pjesë një nga emrat më të mëdhenj të futbollit europian, duke e bërë rrugën drejt fazës së ligës jashtëzakonisht të vështirë, por edhe historike.
Për klubin blu, arritja deri në “play-off” do të ishte një sukses i madh sportiv dhe financiar, pasi do ta vendoste vetëm një hap larg fazës së ligës në Conference League, ku marrin pjesë klubet elitare të kontinentit.
Dinamo siguroi kalimin në raundin e tretë pas fitores bindëse 3-0 ndaj Aluminij në “Elbasan Arena”, duke përmbysur gjithçka pas barazimit 1-1 në ndeshjen e parë. Skuadra e drejtuar nga Ilir Daja tregoi forcë dhe pjekuri, duke mbajtur gjallë ëndrrën europiane.
Tashmë vëmendja është te përballja e radhës, ndërsa një kualifikim do t’i dhuronte Dinamos një duel prestigjioz ndaj një prej emrave më të njohur të futbollit europian në fazën “play-off”, me synimin për të shkruar historinë.