SHBA , 06 gusht 2026 / Albania Express News /-Një nënkomision i Senatit amerikan që po heton ish-drejtorin e Institutit Kombëtar të Alergjisë dhe Sëmundjeve Infektive (NIAID), Dr. Anthony Fauci, ka siguruar një kopje të iPhone-it të tij zyrtar, vetëm një ditë përpara votimit për ta shpallur atë në shpërfillje të Kongresit.
Sipas një zëdhënësi të senatorit republikan Ron Johnson, Departamenti i Shëndetësisë dhe Shërbimeve Njerëzore (HHS) ia dorëzoi pajisjen Nënkomitetit të Përhershëm të Senatit për Sigurinë Kombëtare dhe Hetimet. Johnson deklaroi se shpreson që përmbajtja e telefonit t’u japë përgjigje pyetjeve që, sipas tij, Fauci refuzoi t’u përgjigjej gjatë seancës dëgjimore të javës së kaluar.
Komiteti i Senatit pritet të votojë për një rezolutë që do ta shpallte Fauci-n në shpërfillje të Kongresit, pasi ai ushtroi më shumë se 100 herë të drejtën e Amendamentit të Pestë të Kushtetutës amerikane, duke refuzuar t’u përgjigjej pyetjeve që mund ta vetëinkriminonin.
Hetimi udhëhiqet nga senatorët republikanë Ron Johnson dhe Rand Paul, të cilët prej kohësh kanë ngritur dyshime mbi rolin e Fauci-t gjatë pandemisë së Covid-19 dhe mbi mënyrën se si u trajtuan informacionet për origjinën e koronavirusit. Republikanët argumentojnë se mosbashkëpunimi i tij ngre pikëpyetje, ndërsa demokratët e konsiderojnë hetimin si pjesë të një fushate politike kundër shkencëtarit.
Rand Paul ka bërë të ditur se, nëse rezoluta miratohet, çështja do t’i referohet Departamentit amerikan të Drejtësisë për shqyrtim të mëtejshëm.
Paralelisht me hetimin, komiteti publikoi më shumë se 1,100 faqe nga ditari personal i Fauci-t, që mbulojnë periudhën 2019–2022. Dokumentet përshkruajnë aktivitetin e tij gjatë pandemisë, kontaktet me zyrtarë të administratave Trump dhe Biden, paraqitjet publike dhe shqetësimet e tij për menaxhimin e krizës shëndetësore.
Ndërkohë, Fauci është i mbrojtur nga një falje paraprake e dhënë nga ish-presidenti Joe Biden në fund të mandatit të tij, e cila e mbron nga ndjekja penale federale për veprime ose deklarata të lidhura me periudhën e pandemisë.