Në zonën historike të Gjirokastrës u çel fundjavën që lamë pas edicioni i 7-të i panairit Kult-Art.
Në këtë panair, i cili vijon edhe ditën e sotme, marrin pjesë 30 artizanë nga vendi, Kosova, Mali i Zi dhe Maqedonia e Veriut, të cilët prezantojnë punimet e tyre unike të realizuara me dorë.
Qindra qytetarë, por edhe turistë të huaj, shfaqën interes për punimet e artizanatit, zejtarisë, kulinarisë etj.
Kryetari bashkisë së Gjirokastrës, Flamur Golemi ndau në rrjetet sociale atmosferën nga fundjava në Gjirokastër.
“Kult-Art ka rikthyer në zemrën e qytetit të gurtë ngjyrat, aromat dhe tingujt e traditës, duke sjellë artizanë dhe mjeshtra popullorë, punime unike dore dhe produkte tipike nga të gjitha trevat shqiptare”, tha Golemi.
Gjatë mbrëmjeve Gjirokastra u mbush me muzikë popullore, polifoni, valle e veshje tradicionale, duke krijuar një atmosferë fantastike për qytetarët dhe turistët.
Ky panair është kthyer në një traditë për qytetin e gurtë. Interesi ka qenë i lartë sidomos nga turistët, që duan të njohin më shumë punimet artizanale që prodhohen në trevat shqiptare.
Në këtë stinë vjeshte, ndërsa Gjirokastra vazhdon të mirëpresë turistë të shumtë, organizimi i panairit Kult-Art ndikon drejtpërdrejtë në promovimin e trashëgimisë kulturore, artizanatit, kulinarisë dhe në zhvillimin e turizmit.