Tre ditë pasi publikoi listën me lojtarët e ftuar për dy sfidat e radhës kualifikuese të Botërorit 2026, përballë Shqipërisë dhe Andorrës, trajneri i Serbisë, Dragan Stojkoviç, ka bërë disa ndryshime në përbërje.
Në listë janë shtuar dy emra të rinj: portieri Vanja Dragojeviç, i cili mori një telefonatë në minutën e fundit nga trajneri dhe kështu u transferua nga kombëtarja U21 te skuadra e parë, duke marrë thirrjen e tij të parë me Serbinë; si dhe anësori i Vojvodinës, Lazar Rangjeloviç.
Stojkoviç do të dalë sot në konferencë për shtyp në Stara Pazova, në orën 11:00, ku pritet të sqarojë ndryshimet dhe gjendjen e ekipit. Po sot, kombëtarja serbe nis përgatitjet për ndeshjen vendimtare ndaj Shqipërisë, e cila do të zhvillohet në Leskovac, të shtunën, më 11 tetor.
Pas kësaj sfide, Serbia do të udhëtojë drejt Andorrës për ndeshjen e dytë kualifikuese të këtij cikli.