Një mbledhje e jashtëzakonshme është thirrur sot në orën 17:00, ku anëtarët socialistë të Këshillit Bashkiak të Tiranës do të drejtohen në selinë e Partisë Socialiste. Ky zhvillim vjen pas kërkesës së kryeministrit Edi Rama në Asamblenë e PS-së, për nisjen e procedurave të shkarkimit të Erion Veliajt dhe shpalljen e Ogerta Manastirliut si kandidate për Bashkinë e Tiranës.
Vendimi mund të përfundojë në shqyrtim nga Gjykata Kushtetuese, pasi Veliaj ndodhet ende në paraburgim dhe ndaj tij nuk ka një vendim përfundimtar. Rama tha se Këshilli Bashkiak duhet të aktivizojë mekanizmin e shkarkimit, duke e cilësuar të domosdoshëm për funksionimin normal të administratës së kryeqytetit.
“Është e papranueshme që Tirana të gdhihet dhe të ngryset pa drejtim. Qytetarët nuk mund të presin pafundësisht për të ditur se kush do të udhëheqë kryeqytetin”, u shpreh Rama, duke shtuar se vendimi nuk merret lehtë, por është i nevojshëm për t’i hapur rrugë zgjedhjeve të parakohshme.