NGA ARTIN HALILI
POGRADEC ,25 korrik 2026/Albania Express News/-Pogradeci u mbush me buzëqeshje, emocione dhe momente të paharrueshme, teksa u zhvillua edicioni i katërt i “Maratonës së Bebeve”, një aktivitet tashmë i kthyer në traditë, që çdo vit sjell në qendër të vëmendjes protagonistët më të vegjël. Nisma, e cila lindi në qytetin liqenor si një aktivitet sportiv dhe familjar, vijon të fitojë popullaritet, duke tërhequr gjithnjë e më shumë pjesëmarrës dhe spektatorë.
Në pistën simbolike të garës u përballën fëmijë të moshës nga 1 deri në 3 vjeç, të cilët me hapat e tyre të parë, buzëqeshjet spontane dhe energjinë e pafund krijuan një atmosferë unike. Për disa ishte gara e parë e jetës, ndërsa për familjarët ishte një moment krenarie dhe emocionesh të forta.
Në aktivitet morën pjesë jo vetëm vogëlushë nga Pogradeci, por edhe fëmijë të familjeve që po kalojnë pushimet verore në qytetin buzë liqenit, duke e kthyer këtë maratonë në një festë të vërtetë për banorët dhe turistët.
Organizatorët theksuan se “Maratona e Bebeve” nuk është thjesht një garë, por një aktivitet që synon të promovojë vlerat familjare, rëndësinë e jetesës aktive dhe afrimin e fëmijëve me sportin që në moshë të hershme, përmes lojës dhe argëtimit.
Leonard Peço, përfaqësues i Maraton Albania, u shpreh gjatë aktivitetit se ky organizim ka fituar tashmë identitetin e tij dhe është bërë një nga momentet më të dashura të programit sportiv në Pogradec.
“Maratona e Bebeve është një aktivitet që çdo vit sjell emocione të veçanta. Këtu nuk ka rëndësi kush fiton apo humbet, por fakti që fëmijët dhe familjet kalojnë momente të bukura së bashku. Synimi ynë është të promovojmë sportin, jetën aktive dhe vlerat familjare që në hapat e parë të fëmijëve,” u shpreh Peço.
Atmosfera u bë edhe më emocionuese nga reagimet e prindërve, të cilët ndoqën me ankth dhe entuziazëm çdo lëvizje të vogëlushëve të tyre.
Një prej prindërve tha se pjesëmarrja në këtë aktivitet është një kujtim që do ta ruajnë gjatë.
“Për ne nuk ka rëndësi rezultati. Mjafton që fëmijët të argëtohen dhe të rriten me frymën e sportit. Është një organizim fantastik që i bashkon familjet,” u shpreh ai.
Ndërsa një tjetër prind vlerësoi organizimin dhe atmosferën festive.
“Është një emocion i papërshkrueshëm të shohësh fëmijën tënd në një aktivitet të tillë. Pogradeci ka nevojë për më shumë iniciativa si kjo, sepse sjellin gëzim dhe promovojnë qytetin,” tha ai.
Duartrokitjet, brohoritjet dhe buzëqeshjet shoqëruan çdo metër të garës, ku fitues të vërtetë ishin të gjithë vogëlushët, të cilët u shpërblyen me medalje, dhurata dhe mbi të gjitha me kujtime të bukura.“Maratona e Bebeve” zhvillohet në kuadër të Maratonës Ndërkombëtare Enkelana, e cila këtë vit organizohet për të pestën herë në Pogradec.
Aktiviteti sportiv ka fituar tashmë përmasa ndërkombëtare, duke mbledhur atletë nga rreth 40 vende të botës dhe duke e shndërruar qytetin liqenor në një nga destinacionet më të rëndësishme të sportit dhe turizmit gjatë sezonit veror.
Edhe këtë vit, Pogradeci dëshmoi se sporti nuk njeh moshë. Nga atletët elitarë deri te “kampionët” më të vegjël që sapo kanë nisur të hedhin hapat e parë, qyteti jetoi një ditë të mbushur me emocion, dashuri dhe festë, duke konfirmuar se “Maratona e Bebeve” është tashmë një traditë e dashur për familjet shqiptare.
