OHËR ,04 gusht 2026/Albania Express News/-Kryetari i Bashkisë së Librazhdit, Mariglen Disha, zhvilloi një takim zyrtar me Kryetarin e Komunës së Ohrit, Kiril Pecakov, në kuadër të përpjekjeve për forcimin e bashkëpunimit ndërkufitar dhe zgjerimin e partneriteteve mes dy njësive vendore.
Në një prononcim për mediat, Disha bëri të ditur se takimi u përqendrua në identifikimin e mundësive të reja të bashkëpunimit në kuadër të programeve IPA Cross-Border të Bashkimit Evropian, të cilat mbështesin projekte të përbashkëta mes vendeve fqinje në fusha të ndryshme zhvillimi.
“Kënaqësi të zhvilloja një takim zyrtar me Kryetarin e Komunës së Ohrit, Kiril Pecakov, me fokus forcimin e bashkëpunimit ndërkufitar dhe identifikimin e mundësive të reja për partneritet në kuadër të programeve IPA Cross-Border të Bashkimit Evropian. Takimi u karakterizua nga një frymë konstruktive dhe një angazhim i përbashkët për të thelluar bashkëpunimin institucional, duke krijuar mundësi për zhvillimin dhe zbatimin e projekteve të Bashkimit Evropian në fusha me interes të përbashkët”, u shpreh kryebashkiaku i Librazhdit.
Sipas Dishës, bashkëpunimi mes Librazhdit dhe Ohrit synon të sjellë përfitime konkrete për komunitetet e të dyja anëve të kufirit, përmes projekteve që mund të financohen nga fondet e Bashkimit Evropian. Fushat e bashkëpunimit pritet të përfshijnë zhvillimin ekonomik lokal, turizmin, mbrojtjen e mjedisit, kulturën, infrastrukturën dhe shkëmbimin e praktikave më të mira në administrimin vendor.
Takimi vlerësohet si një hap i rëndësishëm drejt konsolidimit të marrëdhënieve institucionale mes Bashkisë së Librazhdit dhe Komunës së Ohrit, me synimin për të ndërtuar partneritete afatgjata dhe për të rritur mundësitë e përfitimit nga programet evropiane që mbështesin zhvillimin e qëndrueshëm në rajonet ndërkufitare.