STRUGË , 22 gusht 2026/Albania Express News/-Kryetari i Komunës së Strugës, Mendi Qyra, ka zhvilluar një takim me përfaqësues të Shoqatës së Mërgimtarëve të fshatit Tatesh i Poshtëm, duke vlerësuar kontributin e komunitetit të emigrantëve në zhvillimin e vendlindjes.
Përmes një postimi në faqen e tij zyrtare në Facebook, Qyra e ka cilësuar takimin si të ngrohtë dhe domethënës, ndërsa ka theksuar lidhjen e fortë që mërgimtarët vazhdojnë të mbajnë me vendlindjen, pavarësisht se jetojnë jashtë saj.
Sipas kryetarit të Strugës, Shoqata e Mërgimtarëve të Tateshit i Poshtëm përfaqëson një komunitet me më shumë se 300 anëtarë, duke e konsideruar këtë një dëshmi të qartë të interesimit dhe angazhimit të tyre për zonën nga e cila kanë origjinën.
“Bashkëpunimi me mërgimtarët është një urë që duhet ta forcojmë çdo ditë”, është shprehur Qyra, duke vënë në pah rëndësinë e përfshirjes së diasporës në proceset e zhvillimit të vendlindjes.
Në fokus të diskutimeve ka qenë vijimi dhe zgjerimi i aksioneve të përbashkëta mes institucioneve vendore dhe shoqatës së mërgimtarëve. Palët kanë rënë dakord që idetë dhe vullneti i përbashkët të konkretizohen në projekte që synojnë përmirësimin e jetës në Tatesh dhe në të mirë të banorëve të tij.
Qyra ka vlerësuar kontributin, përkushtimin dhe gatishmërinë e mërgimtarëve për të qenë pjesë aktive e zhvillimit të vendlindjes, duke e konsideruar këtë angazhim një vlerë të rëndësishme për të gjithë komunitetin e Strugës.
Përmes këtij bashkëpunimi synohet që lidhja mes mërgimtarëve dhe vendlindjes të mos mbetet vetëm në nivelin e dëshirës apo mbështetjes morale, por të përkthehet në iniciativa dhe projekte konkrete.
Në përfundim të reagimit të tij, kryetari i Komunës së Strugës ka përcjellë edhe një mesazh për rolin e diasporës në zhvillimin e komuniteteve lokale: “Mërgimtari nuk është larg vendlindjes kur është pjesë e zhvillimit të saj.”