TIRANË,13, maj 2026/Albania Express News/Në një moment të rëndësishëm për të ardhmen e organizimit administrativ dhe funksionimit të pushtetit vendor në Shqipëri, Komisioni i Posaçëm Parlamentar për Reformën Administrativo-Territoriale zhvilloi sot një seri dëgjesash me kryetarët e bashkive të qarkut të Elbasanit, ku në qendër të diskutimeve ishin efektet e reformës territoriale të vitit 2014, sfidat financiare të njësive vendore, si dhe nevoja për rritjen e cilësisë së shërbimeve ndaj qytetarëve.
Në këtë tryezë konsultative mori pjesë edhe kryebashkiaku i Librazhdit, Mariglen Disha, i cili shprehu mbështetjen e plotë të bashkisë që ai drejton për nismën e re të reformës territoriale, duke e konsideruar atë një proces të domosdoshëm për forcimin e qeverisjes vendore dhe përmirësimin e administrimit lokal.
Gjatë fjalës së tij, Disha theksoi se Bashkia e Librazhdit është e gatshme të japë kontribut konkret në hartimin e një reforme që vendos në qendër interesin e qytetarëve, zhvillimin ekonomik dhe eficiencën institucionale.
“Bashkia Librazhd mbështet nismën për reformën territoriale si një hap të rëndësishëm për përmirësimin e shërbimeve dhe zhvillimin e qëndrueshëm të zonës sonë. Jemi të gatshëm të kontribuojmë që kjo reformë të jetë në funksion të qytetarëve dhe zhvillimit të vendit”, deklaroi Disha.
Diskutimet gjatë dëgjesës u përqendruan në një sërë çështjesh kyçe që prekin drejtpërdrejt funksionimin e bashkive, duke nisur nga autonomia financiare, menaxhimi i të ardhurave vendore, nevoja për investime më të mëdha në infrastrukturë dhe deri te garantimi i shërbimeve cilësore për komunitetet, veçanërisht në zonat rurale dhe të thella.
Kryebashkiakët e pranishëm evidentuan gjithashtu sfidat me të cilat përballen njësitë vendore pas ndarjes territoriale të vitit 2014, duke kërkuar një analizë të thelluar mbi eficiencën administrative, balancimin e burimeve financiare dhe rritjen e kompetencave të pushtetit vendor.
Në këtë kuadër, qëndrimi i Bashkisë së Librazhdit u vlerësua si një qasje konstruktive dhe bashkëpunuese ndaj procesit të reformimit, me fokus krijimin e një modeli më funksional, më afër qytetarëve dhe më të aftë për t’iu përgjigjur nevojave reale të komuniteteve.
Reforma administrativo-territoriale mbetet një nga proceset më të rëndësishme institucionale në vend, ndërsa konsultimet me drejtuesit vendorë pritet të luajnë një rol kyç në hartimin e propozimeve të reja për organizimin territorial dhe forcimin e decentralizimit në Shqipëri.