HIMARË , 31 korrik 2026/Albania Express News/-Në zonat bregdetare vijojnë kontrollet për garantimin e përdorimit të rregullt të hapësirave publike dhe respektimin e standardeve të administrimit të plazheve.
Ministri i Turizmit, Kulturës dhe Sportit, Blendi Gonxhja tha sot se “në Himarë vijojnë inspektimet nga Agjencia Kombëtare e Bregdetit dhe bashkitë për respektimin e hapësirave publike në plazhe”.
“Ndërkohë, një rampë ekologjike e re po përmirëson aksesin në plazhin e Himarës për personat me aftësi ndryshe, duke e bërë bregdetin më gjithëpërfshirës”, tha Gonxhja.
Këto kontrolle synojnë një menaxhim më efikas të plazheve publike, garantim të aksesit të lirë për pushuesit dhe respektimin e standardeve të përcaktuara për sezonin veror.
AKB do të vijojë monitorimin përgjatë vijës bregdetare, me prioritet mbrojtjen e hapësirave publike dhe krijimin e kushteve sa më të mira për qytetarët dhe turistët që zgjedhin bregdetin shqiptar gjatë muajve të verës.