BOTËRORI 2026, 10 korrik 2026/Albania Express News/-Eliminimi i Marokut nga Kupa e Botës 2026 ka shkaktuar tensione në disa zona të Londrës, ku mbrëmjen e së enjtes pati përplasje mes policisë dhe turmave të tifozëve.
Franca mposhti Marokun me rezultatin 2-0 në çerekfinale, duke i dhënë fund rrugëtimit të ekipit afrikan në turne për të dytin Botëror radhazi. Goli i Kylian Mbappé dhe Ousmane Dembélé siguruan kualifikimin e “Les Bleus” në gjysmëfinale.
Pas ndeshjes, shqetësimet kryesore ishin për situatën në Paris, ku shumëkush kishte frikë për protesta apo trazira, sidomos pas skenave kaotike që pasuan festimet e tifozëve të Paris Saint-Germain pas triumfit në Champions League në muajin maj.
Megjithatë, tensionet u shfaqën në Londër. Pamje të publikuara nga zona e Edgware Road, në veriperëndim të kryeqytetit britanik, treguan përplasje mes forcave të policisë dhe grupeve të mëdha të njerëzve. Në rrugë u panë tym, mbetje dhe sende të hedhura, ndërsa policia përdori pajisje mbrojtëse për të kontrolluar turmat.
Forcat e rendit, të pajisura me mburoja dhe jelekë mbrojtës, tentuan të shpërndanin turmat, ndërsa disa persona hodhën fishekzjarre dhe objekte të ndryshme. Një video dukej se tregonte edhe një efektiv policie të shtrirë në tokë, megjithëse nuk dihet gjendja e tij apo rrethanat e dëmtimit.
Gjatë përleshjeve, disa tifozë valëvitën flamuj marokenë në mes të rrugës, duke penguar qarkullimin. Disa të tjerë u ngjitën edhe mbi automjete që përpiqeshin të kalonin në zonë.
Në kontrast me Londrën, Parisi nuk përjetoi të njëjtin nivel tensioni. Në kryeqytetin francez, tifozët francezë dhe marokenë dolën në rrugë për të festuar, duke krijuar një atmosferë më shumë festive sesa konfrontuese. Në disa zona të qytetit, automjetet qarkullonin me flamujt e të dyja vendeve dhe tifozët festonin së bashku.
Fitorja e Francës erdhi falë golave të Mbappé dhe Dembélé, ndërsa sulmuesi i Real Madridit arriti në kuotën e tetë golave në këtë Botëror, duke barazuar rekordin e Lionel Messit për numrin më të lartë të golave në turne.
Franca siguroi pjesëmarrjen e tretë radhazi në gjysmëfinalet e Kupës së Botës, ndërsa Maroku, pavarësisht eliminimit, shkroi historinë duke u bërë kombëtarja e parë afrikane që arrin më shumë se një herë në fazën e çerekfinaleve të Botërorit.
Me eliminimin e Marokut, nuk ka më skuadra afrikane në garë për trofeun. Franca tani do të përballet me fituesin e përballjes mes Spanjës dhe Belgjikës në gjysmëfinale.