Një atmosferë e veçantë mbulon vigjiljen e derbit të Torinos. Juventusi përgatitet për sfidën ndaj Torinos (ora 18:00, “Allianz Stadium”), por pa konferencën e zakonshme për shtyp. Trajneri Luçiano Spaleti ka vendosur të mos dalë para mediave, duke treguar përqendrim total te ndeshja.
Arsyeja lidhet me Asamblenë e Aksionarëve të zhvilluar një ditë më parë, ku klubi diskutoi çështje financiare dhe drejtimi. Spaleti do të flasë vetëm pas ndeshjes.
Për toskanasin, ky është debutimi i parë në derbin e Torinos, pas përvojave të mëdha me derbin e Romës dhe të Milanos. Ai kërkon të transmetojë karakter dhe qetësi në një Juventus që po rikthehet pas krizës.
Pas tetë ndeshjeve pa fitore, bardhezinjtë kanë marrë dy suksese radhazi dhe synojnë konfirmimin në derbi. Nga ana tjetër, Torino do të jetë pa trajnerin Baroni, i pezulluar, por me moral të lartë.
Derbi i sotëm vlen më shumë se tre pikë: për Juventusin, është testi i parë i madh i epokës Spaleti; për Torinon, një çështje krenarie qyteti.