LIBRAZHD ,18 prill 2026/Albania Express News/Një tjetër investim i rëndësishëm infrastrukturor po merr jetë në territorin e Bashkisë Librazhd, duke prekur drejtpërdrejt jetën e banorëve të Njësisë Administrative Polis. Kryetari i bashkisë, Mariglen Disha, ka ndarë në rrjetet sociale pamje dhe detaje nga inspektimi në terren i punimeve në segmentin rrugor që lidh Mirakë Plane me Mirakë Katund.
I shoqëruar nga deputetët Bora Muzhaqi dhe Olsi Komici, Disha ka parë nga afër ecurinë e projektit, i cili po zbatohet me ritme të kënaqshme dhe sipas standardeve bashkëkohore të ndërtimit rrugor.
Sipas informacioneve zyrtare, projekti i financuar nga fondet e Bashkisë Librazhd përfshin një ndërhyrje të plotë në këtë aks: sistemim të trupit të rrugës, asfaltim cilësor dhe ndërtimin e kanalizimeve anësore, duke garantuar jo vetëm jetëgjatësi të investimit, por edhe siguri më të lartë për përdoruesit.
Ky segment rrugor konsiderohet jetik për komunitetin e zonës së Polis-it, pasi lidh më ngushtë fshatrat me njëri-tjetrin dhe me qendrën urbane të Librazhdit. Përmirësimi i infrastrukturës pritet të ndikojë drejtpërdrejt në lehtësimin e lëvizjes së përditshme të banorëve, si dhe në zhvillimin ekonomik të zonës.
Një vëmendje e veçantë i është kushtuar edhe ndikimit që ky investim do të ketë në sektorin bujqësor. Banorët e zonës, të cilët mbështeten kryesisht në prodhimet bujqësore, do ta kenë më të lehtë transportin e produkteve drejt tregjeve, duke ulur kostot dhe rritur mundësitë për shitje.
Ky projekt vjen si pjesë e një sërë investimesh që Bashkia Librazhd ka ndërmarrë për përmirësimin e infrastrukturës rrugore në zonat rurale, me synimin për të rritur cilësinë e jetesës dhe për të frenuar braktisjen e fshatrave.
Kryetari i bashkisë së Librazhdit z.Marglen Disha shprehet optimist dhe i vendosur për të vijuar me projekte të tjera zhvillimore në Njësinë Administrative Polis , duke e konsideruar infrastrukturën si një ndër shtyllat kryesore për zhvillimin e qëndrueshëm të territorit.
