HIMARË, 5 maj 2026/Albania Express News/ Himara ka çelur zyrtarisht sezonin turistik veror 2026 me një program treditor aktivitetesh kulturore, sportive dhe argëtuese, të organizuara nga bashkia në zonat kryesore bregdetare të qytetit.
Aktivitetet që u zhvilluan në datat 1, 2 dhe 3 maj, përfshinë koncerte, panaire, evente për fëmijë, aktivitete sportive, kinema në natyrë, festivale dritash, si dhe sporte ujore si kajak dhe zhytje.
Kryeministri Edi Rama ndau sot në rrjetet sociale momente nga çelja e sezonit turistik në Himarë, të cilat i cilësoi “tri ditë plot jetë, energji dhe festë”.
Himara mbetet një nga destinacionet më të preferuara të bregdetit shqiptar, falë plazheve si Livadhi, Spile, Potami, Llamani dhe Filikuri, si dhe kombinimit të turizmit detar me natyrën, kulturën dhe traditën vendase.
Zgjerimi i ofertës turistike përtej sezonit tradicional të verës, synon ta kthejë Himarën në një destinacion të vizitueshëm gjatë gjithë vitit.